Sonur Geirmundar baðst ekki undan því að gefa skýrslu fyrir dómi

Sverrir Geirmundsson baðst ekki undan því að gefa skýrslu í máli gegn föður sínum Geirmundi Kristinssyni, fyrrverandi sparisjóðsstjóra Sparisjóðs Keflavíkur, í Héraðsdómi Reykjaness í dag. Vegna fjölskyldutengsla hefði Sverrir getað neitað því að gefa skýrslu fyrir dómi í máli þar sem faðir hans er ákærður en hann kaus að gefa skýrslu.

Geirmundur er ákærður fyrir umboðssvik en ákæran gegn honum er í tveimur liðum og tengist lánafyrirgreiðslum upp á samtals rúmar 780 milljónir króna en af þeim töpuðust um 730 milljónir króna.

Hann er sakaður um að hafa misnotað aðstöðu sína og stefnt fé sjóðsins í verulega hættu þegar hann veitti einkahlutafélaginu Duggi 100 milljóna króna yfirdráttarlán. Lánið var fært yfir í Sparisjóðabankanna, sem þá hét Icebank, sem notað var sem handveð fyrir öllum skuldum og skuldbindingum félagsins Suðurnesjamanna ehf. gagnvart bankanum.

Geirmundur er einnig ákærður fyrir að hafa valdið félaginu verulegri fjártjónshættu þegar hann sem stjórnarformaður dótturfélags sjóðsins framseldi stofnfjárbréf í Sparisjóði Keflavíkur, að verðmæti rúmlega 683 milljóna króna, í lok árs 2007 til félagsins Fossvogshyls ehf. Ekkert endurgjald kom á móti bréfunum en við framsalið eignaðist dótturfélag sjóðsins kröfu á Fossvogshyl. Á endanum fengust um 50 milljónir upp í kröfurnar.

Enginn lánasamningur mun hafa verið gerður og ekki gengið frá neinni tryggingu fyrir því að krafan yrði greidd, að því er segir í ákærunni. Félagið var síðar framselt til sonar Geirmundar, Sverris, í mars árið 2008. Lánveiting var að fullu afskrifuð í bókhaldi sparisjóðsins í mars árið 2010 eftir að krafa Víkna var færð yfir í sjóðinn og flokkuð þar sem útlán.

Sverrir var í stjórn Fossvogshyls en hann sagðist ekki hafa átt neina aðkomu að rekstri félagsins en að hafa setið í stjórn. Honum var ekki kunnugt um hver stjórnaði félaginu, þrátt fyrir að hafa verið í stjórn.

Hann var spurður út í undirskriftir sínar á samþykktir innan stjórnar Fossvogshyls en hann gat ekki staðfest að um væri að ræða sínar undirskriftir og gekk svo langt í einu tilviki að halda því fram að undirskriftin líktist ekki hans eigin og að ef hennar hefði verið aflað þá hefði það verið gert á fölskum forsendum.

Hann sagðist aldrei hafa átt félagið Fossvogshyl og talaði um meint framsalsgögn og að plögg um framsöl í þeim efnum væru fölsuð.  Hann sagðist aldrei hafa verið eigandi að Fossvogshyl heldur aðeins verið beðinn um að koma tímabundið inn í stjórn félagsins. Það hefði verið staðfest í samtali við endurskoðanda.

Fyrr í dag baðst Geirmundur undan því að svara spurningum saksóknara við aðalmferðina sem vörðuðu ákæruna. Hann sagðist hafa svarað slíkum spurningum í skýrslutöku hjá lögreglu og að þau svör stæðu. Hann neitar sök í málinu en á yfir höfði sér allt að sex ára fangelsisvist verði hann fundinn sekur.