Mæla lýsingu í Reykjavík

„Mælingarbíll verður á ferðinni næstu sex nætur og ekur hann samtals 250 kílómetra leið um götur borgarinnar,“ segir í frétt á vef Reykjavíkurborgar um mælingar á götulýsingu.

„Bíllinn fer á aðeins 10 kílómetra hraða og eru því vegfarendur beðnir um að sýna aðgát og skilning ef hann verður á vegi þeirra,“ segir í fréttinni. „Gögnum verður safnað í öllum hverfum borgarinnar. Mældur er ljósstyrkur, ljómi og jafnleiki, en það er hlutfall milli minnsta og mesta ljósstyrks á götu.“

Úttektin er sögð undirbúningur að endurnýjun götulýsingar í Reykjavík. „Við fáum með þessum mælingum samanburð við lýsingu í öðrum borgum, en því hefur stundum verið haldið fram að borgin sé yfirlýst,“ er haft eftir Guðjóni L. Sigurðssyni, lýsingarhönnuði hjá Verkís.

Þessi grein birtist fyrst í Fréttablaðinu þann 9. apríl.