Kæra fyrirtæki fyrir að ljúga að neytendum

Félag pípulagningameistara hefur lagt inn kæru á hendur tveimur fyrirtækjum en félagið sakar þau um að starfa að pípulögnum í trássi við lög. Gangi ófaglærðir í störf meistara og því um vörusvik að ræða. Formaður stjórnar félagsins segir slíka starfsemi vera að færast í aukana.

„Ég hef lagt inn kæru fyrir hönd félagsins vegna tveggja fyrirtækja. Þar starfar fyrirtækið við pípulagnir án þess að það starfi í forstöðu meistara. Það er bæði stórvarasamt fyrir neytendur sem og að það kemur niður á orðspori stéttarinnar. Að sama skapi munum við óska eftir lögbanni á starfsemi fyrirtækjanna,“ segir Guðmundur Páll Ólafsson, formaður Félags pípulagningameistara. 

„Við erum síðan með nokkur önnur fyrirtæki til skoðunar. Hingað eru einnig að koma Litháar í gegnum starfsmannaleigur og erum við að kanna réttindi þeirra fyrirtækja því samkvæmt lögum þarf pípulagningameistari að vera í forsvari fyrir verk sem unnin eru í pípulögnum.“

Mikill uppgangur er í íslensku efnahagslífi og skortur á iðn­menntuðu fólki í hinum ýmsu starfsgreinum. Hilmar Harðarson, formaður Samiðnar, segir að í gegnum átakið „einn réttur, ekkert svindl“, sem unnið er með ASÍ, sé grunurinn staðfestur um lögbrot fjölda fyrirtækja. 

„Við erum í átaki um að heimsækja fyrirtæki. Við erum að verða varir við það að í þessum uppgangi rekumst við æ oftar á fyrirtæki sem eru ekki með fagmenn á sínum snærum og stunda einnig svarta atvinnustarfsemi og önnur alvarlegri brot.“

Tryggvi Axelsson, forstjóri Neytendastofu, segir það skipta miklu máli að neytendur séu að fá þá vöru og þjónustu sem verið sé að kaupa og að menn sigli ekki undir fölsku flaggi. „Það er mikilvægt að menn hafi réttindi í því fagi sem þeir vinna við og að þeir greini rétt frá stöðunni. Neytendur eru varðir fyrir slíku á margvíslegan hátt og því mikilvægt að neytendur kanni þessa hluti og þekki rétt sinn.“



Fréttin birtist fyrst í Fréttablaðinu 8. júní 2016