Þingmenn vilja algjört bann við arðgreiðslum

alþingi Óheimilt verður að semja við einkaaðila um rekstur heilsugæslu eða á heilbrigðisstofnun nema með samþykkt Alþingis og bann lagt við arðgreiðslum, samkvæmt frumvarpi til breytinga á lögum um sjúkratryggingar. Sigríður Ingibjörg Ingadóttir og fimm aðrir þingmenn Samfylkingarinnar leggja frumvarpið fram. Í greinargerð segir að með því sé brugðist við stefnu ríkisstjórnarinnar um frekari einkarekstur í grunnþjónustu velferðarkerfisins. Við þessar breytingar þyrfti ráðherra skýrt umboð Alþingis hverju sinni til að semja við einkaaðila um rekstur mikilvægra stoða heilbrigðiskerfisins. Að óbreyttu geti ráðherra tekið stefnumótandi ákvarðanir fyrir heilbrigðiskerfið án þess að bera þær undir þingið. Vitnað er til könnunar frá því í apríl 2013 þar sem 80 prósent aðspurðra vildu að rekstur heilbrigðisþjónustu yrði fyrst og fremst á vegum hins opinbera, og til þess að ýmsir fræðimenn hafi bent á að einkarekstur í heilbrigðiskerfi auki frekar heildarkostnað en að hann dragi úr. Í frumvarpinu er lagt til skilyrðislaust bann við arðgreiðslum þegar gerðir eru samningar um heilbrigðisþjónustu og varðar alla samninga um heilbrigðisþjónustu sem gerðir eru á grundvelli laga um sjúkratryggingar. „Skattfé sem Alþingi hefur ákveðið með fjárlögum að nýta skuli í heilbrigðiskerfinu á með sönnu að nýta þar,“ segir jafnframt og að „ef afgangur er í rekstri einkaaðila sem samið hafa um reksturinn við ríkið ber að nýta þann afgang til fjárfestingar í rekstrinum og auka þannig gæði þjónustunnar, bæta umbúnað sjúklinga, starfsskilyrði og menntun starfsfólks og stuðla með því að betri heilbrigðisþjónustu sem nýtir almannafé á ábyrgan hátt.“  – shá