Mun færri greiða fjármagnstekjuskatt

Fjármagnstekjur drógust saman um 36 prósent frá árinu 2010 til 2015, en greiðendum fjármagnstekjuskatts fækkaði um 80 prósent. Þetta kemur fram í Staðtölum skatta sem birtar voru á vef ríkisskattstjóra í vikunni.

Til skattskyldra fjármagnstekna einstaklinga teljast vaxtatekjur, arður, söluhagnaður og leigutekjur utan rekstrar. Á þessar tekjur er lagður fjármagnstekjuskattur, söluhagnaður getur þó verið skattfrjáls eftir eignarhaldstíma eða tegundum eigna.

Fjármagnstekjur námu 90,5 milljörðum króna árið 2015, samanborið við 139,3 milljarða árið 2010. Tekjurnar tóku dýfu milli áranna 2010 og 2011 þegar þær lækkuðu um helming.

Á sama tíma fækkaði framteljendum fjármagnstekna (og greiðendum fjármagnstekjuskatts) úr 182.699 í 38.780 (tölur um fjölda framteljenda með fjármagnstekjur vísa til fjölda fjölskyldna en ekki einstaklinga).

Skúli Eggert Þórðarson ríkisskattstjóri segir að það sem skýri helst þessa þróun sé að frítekjumark var tekið upp árið 2009 sem gerði ráð fyrir að fyrstu 125 þúsundin af vaxtatekjum væru skattlaus.

„Þetta er lagabreyting sem skýrir þetta að mestu leyti, því langflestir sem greiða fjármagnstekjuskatt greiða lítið. Það varð strax mikil breyting árið 2011. Fjármagnstekjuskatturinn var á móti hækkaður úr 10 prósentum í áföngum í 20 prósent, þannig að skattarnir eru þyngri á þeim sem þurfa að greiða hann,“ segir Skúli.

„Það er alltaf einhver dulin starfsemi og auðvitað er svört starfsemi eitthvað af þessu,“ heldur Skúli áfram. „En þegar við skoðum leigutekjur er líklegra að þær séu að skila sér betur með nýjum reglum.“

Heildarleigutekjur jukust úr 6 milljörðum króna árið 2010 í 8,9 milljarða árið 2015, eða um 48 prósent. Á sama tíma fjölgaði framteljenda leigutekna um 9,3 prósent.

„Þetta hefur löngum verið vandamál með leigutekjurnar en við teljum að það sé í skárra horfi nú eftir þessar breytingar. Hærri leigutekjur sýna að það eru fleiri að gefa þær upp,“ segir Skúli.

Embætti ríkisskattstjóra telur, að sögn Skúla, að það sé mjög óverulegt sem skotið er undan af fjármagns­tekjum úr fjármálastofnunum og fyrirtækjum í formi arðgreiðslna.

Fréttin birtist fyrst í Fréttablaðinu.