Sprengjuhótunin reyndist vera vírus

Sprengjuhótunin sem barst farþega, erlendum nemanda, um borð í Herjólfi í morgun reyndist vera vírus, að sögn Páleyjar Borgþórsdóttur, lögreglustjóra í Vestmannaeyjum. Ferjan var rýmd og lögregla kölluð til eftir að hótunin barst, en ekkert dularfullt fannst um borð.

„Einn nemandinn opnaði símann sinn inni á opnu vefsvæði, opnu neti í skipinu - WiFi eða svokölluðu Hotspot. Þar fær viðkomandi skilaboð um að það sé sprengja um borð. Það var í raun ekkert annað tilgreint í skilaboðunum,“ segi Páley í samtali við Vísi.

„Það er nokkuð algengt að þetta gerist með þessi opnu vefsvæði. Það er þannig að sá fyrsti sem skráir sig inn á vefsvæðið fær skilaboðin. Þetta þekkist um allan heim og líka á Íslandi. Það eru eflaust einhverjir sem líta á þetta sniðugan hrekk, sem þetta er auðvitað ekki.“

Hótunin barst um klukkan hálf ellefu í morgun. Innan við klukkustund síðar hafði lögregla leitað af sér allan grun. Páley segir að haft hafi verið samband við sérsveit lögreglu, en að ekki hafi verið talin þörf á að kalla hana út.

Nemendurnir, sem eru á framhaldsskólaaldri, komu frá Norðurlöndum, að sögn Páleyjar, og voru í dagsferð í Vestmannaeyjum.