Stjórn Framsóknarflokksins ræðir meint svindl í formannskosningunni

Framkvæmdastjórn Framsóknarflokksins mun funda síðar í dag þar sem fullyrðingar formanns Framsóknarfélagsins í Reykjavík, þess efnis að svindlað hafi verið í formannskosningu flokksins um liðna helgi, verða meðal annars ræddar.

Samkvæmt upplýsingum frá flokknum mun framkvæmdastjórnin ekki tjá sig um ummæli hans fyrr en að fundinum loknum, en fréttastofa hefur ítrekað reynt að ná tali af framkvæmdastjóranum vegna málsins.

Sveinn Hjörtur Guðfinnsson, formaður Framsóknarfélagsins í Reykjavík, sagði í Fréttablaðinu í dag að nokkrir skráðir þingfulltrúar í Reykjavík hafi ekki verið með kosningarétt á flokksþinginu þrátt fyrir að hafa þeir hafi verið sérstaklega skráðir sem fulltrúar fyrir flokksþingið, svo þeir hefðu atkvæðisrétt. Sagði hann fjölda fólks hafa sagt sig úr flokknum og að erfitt verði að ná honum aftur sem einni heild.

Sem fyrr segir hefur fréttastofa reynt að ná tali af Einari Gunnari Einarssyni, framkvæmdastjóra Framsóknarflokksins, í morgun en án árangurs.