Byrja að rukka á Þingvöllum í maí

Byrjað verður að innheimta bílastæðagjald á Þingvöllum frá og með 1. maí næstkomandi. Vonast er til þess að gjaldið muni skila fjörutíu til fimmtíu milljónum króna sem nýtt verður í nauðsynlegar framkvæmdir og bætta þjónustu, segir Ólafur Örn Haraldsson þjóðgarðsvörður.

„Við erum ekki að biðja um peninga eða gjald til þess að fjármagna eitthvað fram í tímann heldur erum við með þessu að fá fé fyrir framkvæmdir og þjónustu sem við höfum þegar innt af hendi í tvö ár. Við höfum sett tugi milljóna, 80-90 milljónir, í ný bílastæði. Við höfum aukið þjónustu með því að sanda í hálku, hálkuverja, moka snjó, auka þjónustu starfsmanna og svo framvegis,“ segir Ólafur.

Bílastæðagjaldið verður 500 krónur á fólksbíl, 750 krónur á jeppa og hópferðabíla fyrir átta farþega, 1.500 krónur fyrir níu til átján manna bíla, og loks 3.000 krónur fyrir nítján farþega eða fleiri. Gjaldið, sem veitir heimild til að leggja í einn sólarhring, verður innheimt á þremur stöðum; á Hakinu, á Þingplani neðan Almannagjár og á gamla Valhallarreitnum.

Ólafur segir gjaldið koma til með að skipta sköpum. „Við eigum von á gríðarlegri fjölgun ferðamanna og erum að gera ráð fyrir að taka á móti upp undir milljón ferðamönnum. Það sjá það allir að það er ekkert hægt fyrir stað sem á að vera í fremstu röð eins og Þingvellir að veita þjónustu og stöðugt að auka starfsliði og þjónustu nema við höfum eitthvert fé.“

Ákvörðun um innheimtu var tekin í júlí í fyrra og til stóð að taka hana upp í nóvember sama ár. Ólafur segir ferðaþjónustufyrirtæki hafa beðið um að innheimtu yrði frestað sem Þingvallanefnd hafi fallist á. Þá hafi ferðaþjónustuaðilar tekið misvel í þetta nýja fyrirkomulag. „Þau hafa tekið bæði vel og illa í þetta. Það er samkomulag og skilningur á því að í ferðaþjónustunni að það sé eðlilegt að innheimta gjald og að greitt sé fyrir veitta þjónustu, en ekki aðgangsgjald. Það er greinarmunur á því. Þau hefðu viljað fá lengri tíma til aðlögunar, enda sum fyrirtæki með gjaldskrá langt fram í tímann,“ segir hann.