Ugla gerir sig heimakomna í hlöðu í Fnjóskadal

Guðbergur Egill Eyjólfsson, bóndi á Brúnagerði í Fnjóskadal náði myndum af óvæntum næturgesti í hlöðunni á Brúnagerði. Myndarlegasta brandugla hefur þar gert sig heimakomna. Guðmundur segir það æ algengari sjón að sjá uglur í Fnjóskadalnum.

„Það fauk ein járnplata af hlöðunni í vondu veðri hérna fyrir nokkru og hún hefur komist þar inn,“ segir Guðmundur. „Hún virðist ekki finna leiðina út en ég er búinn að opna stórt hlöðugat og vonandi kemst hún út í nótt.“

Sem unglingur var Guðbergur í sveit í Grýtubakkahrepp og minnist hann þess að hafa nokkrum sinnum orðið var við uglur á þeim tíma. Síðastlið sumar hafi hann hinsvegar reglulega séð uglur víða um Fnjóskadal.

„Ég man eftir að hafa séð ugluunga rölta yfir þjóðveginn þegar ég var unglingur. Maður sá uglur kannski svona einu sinni til tvisvar á þessum 10-15 árum,“ segir Guðmundur. „Síðasta sumar sá maður uglur víða í dalnum og hann er nú svolítið langur. Maður hrekkur orðið allavega ekki í kút þegar maður sér þær.

Samkvæmt upplýsingum frá Vísindavefnum er branduglan eini reglulegi varpfuglinn af ugluætt hér á landi þó að snæuglan eigi það til að líta við. Verpa branduglur aðallega á láglendi og þá einkum í Þingeyjarsýslu og Eyjafirði en einnig í Borgarfirði.

Mýs eru helsta fæða brandugla og þá aðallega hagamýs en einnig húsamýs. Litlir vað- og spörfuglar eru einnig mikilvæg fæða.