Vilja ekki að breytingar um umbætur bíði til 2017

BSRB vill að umbætur á lögum um fæðingarorlof taki gildi strax. Þörf sé á að stíga stærri og hraðari skref í átt til þess að gera íslenskt samfélag fjölskylduvænna, til þess að Ísland verði eftirsóknavert land fyrir ungt fólk. Lenging fæðingarorlofs, óskertar greiðslur upp að 300 þúsund krónum og hækkun hámarksgreiðslna eru mikilvæg skref að því markmiði, að mati BSRB.

Sonja Ýr Þorbergsdóttir, lögfræðingur BSRB, segir í tilkynningu Íslendinga standa langt að baki öðrum Norðurlandaþjóðum þegar kemur að stuðningi við barnafjölskyldur. Hún var fulltrúi bandalagsins í starfshóp um framtíðarstefnu í fæðingarorlofsmálum, sem skilaði tillögum sínum nýverið til ráðherra.

Sonja segir það fagnaðarefni að Eygló Harðardóttir, félags- og húsnæðismálaráðherra, hyggist vinna frumvarp úr tillögum starfshópsins. Verði tillögur hópsins að veruleika bæti það íslenskt samfélag og auki þar með líkurnar á því að ungt fólk kjósi að búa hér. Það væri skref í rétta átt svo að Ísland verði samkeppnishæft um ungt fólk að mati Sonju.

Í skýrslu starfshópsins er miðað við að breyting á greiðslum komi til framkvæmda vegna barna sem fæðast, eru ættleidd eða tekin í varanlegt fóstur frá og með 1. janúar 2017. BSRB telur ekki þörf á að bíða svo lengi.