Heimilislaus maður sem benti lögreglu á flóttafanga fær 12,7 milljónir

Hinn heimilislausi Matthew Hay-Chapman sem fann strokufanga í janúar mun fá hundrað þúsund dali, eða um 12,7 milljónir króna frá Orange County fyrir að hjálpa lögreglu. Hann bar kennsl á þá Hossein Nayeri og Jonathan Tieu þar sem þeir lágu sofandi í sendiferðabíl.

Verðlaunaféð var í heildina 150 þúsund dalir, en aðrir sem einnig höfðu hjálpað lögreglunni fá hluta af því.

Skipting verðlaunanna var ákveðin á fundi yfirvalda í Orange County í gær. Hægt er að hlusta á fundinn hér á vefsvæði Orange County.

Chapman var á leið á McDonalds þegar hann sá sendiferðabílinn og það fyrsta sem hann sá var að mikill raki var á rúðunum. Sjálfur bjó hann í sendiferðabíl í nokkur ár og því grunaði hann að einhver væri sofandi þarna inni. Þá tók hann eftir því að númeraplöturnar höfðu verið fjarlægðar af bílnum.

Þegar einn maður steig út úr bílnum kannaðist hann við manninn eftir að hafa séð mynd af honum í dagblöðum.

Strokufangarnir höfðu verið á flótta frá 22. janúar, en það var þann 30. þegar Chapman sá bílinn og benti tveimur lögregluþjónum á hann. Þriðji strokufanginn gaf sig fram degi seinna.

Í samtali við ABC7 News í febrúar sagðist Chapman ætla að nota verðlaunaféð til þess að byggja upp líf sitt að nýju og hjálpa börnunum sínum.

Chapman ræddi við fjölmiðla í febrúar.