Hrókeringar í framlínunni ekki til umræðu

Ásmundur Einar Daðason, þingflokksformaður Framsóknar, segir að ekki hafi komið til tals að skipta um formann flokksins á fundi landsstjórnar hans í gærkvöldi.

Vísir greindi frá því í morgun að ákveðið hafi verið að boða til vorfundar miðstjórnar Framsóknarflokksins þegar Sigmundur Davíð Gunnlaugsson, formaður flokksins, kemur aftur úr leyfi í byrjun júnímánaðar.

Sjá einnig: Blása til fundar þegar Sigmundur kemur úr fríi

Ásmundur segir að miðstjórnin taki ekki ákvörðun um hrókeringar í framlínu flokksins. Það sé hins vegar gert á flokksþingi Framsóknar sem miðstjórnin boðar til.

Slíkar hrókeringar hafi ekki borist í tal á fundi gærkvöldsins - þar hafi einungis verið rætt um hvenær miðstjórnarfundurinn skyldi haldinn.

Sjá einnig: Skiptar skoðanir meðal framsóknarráðherra um flokksþing

„Svo er það bara miðstjórnarmannanna sjálfra að taka ákvörðun um það hvort að þeir vilji hafa flokksþing eða ekki. Það er ekki mitt að svara því.“

Aðspurður um hvort hann telji að stuðningur við Sigmund hafi dvínað í ljósi atburða síðustu daga segir Ásmundur: „Ég finn fyrir því inni í þingflokki Framsóknarflokksins að það er bara stuðningur við þá forystu sem er hverju sinni; bæði formann, varaformann og ritara flokksins. Það er svo bara flokksþings að taka ákvörðun um framhaldið í svona löguðu.“