Sumarhús Hrafns ógn við vatnsvernd Reykvíkinga

Sumarhús í eigu Hrafns Gunnlaugssonar telst nú ógn við vatnsvernd Reykvíkinga og stendur Hrafn í málaferlum við Orkuveitu Reykjavíkur. 

Um er að ræða sumarhús við Elliðavatnsblett þrjú í Reykjavík sem hefur verið í eigu fjölskyldu Hrafns í marga áratugi. Við húsið stendur bautasteinn til minningar um Ellen Johanne Sveinsson, með áletruninni „Hún valdi börnum sínum sumarland hér“ en Ellen var amma Hrafns Gunnlaugssonar. Sjálfur tók hann við lóðinni af móður sinni Herdísi Þorvaldsdóttur leikkonu við andlát hennar. 

Húsið er eitt af 25 bústöðum við Elliðavatn sem Orkuveita Reykjavíkur telur nauðsynlegt að hverfi á næstu árum vegna vatnsverndarsjónarmiða.

Við fjöllum um þetta óvenjulega mál og ræðum við Hrafn í kvöldfréttum Stöðvar 2 í opinni dagskrá klukkan 18:30.