Hvetur fólk til að klæðast skræpóttum sokkum í dag

Alþjóðlegur dagur Downs-heilkennis er haldinn hátíðlegur í dag en tilgangur hans er að auka vitund fólks á heikenninu og minnka aðgreiningu. Fólk um allan heim er hvatt til að klæðast litríkum mislitum sokkum í tilefni dagsins.

Þetta er í sjöunda skipti sem þessi dagur er haldinn hátíðlegur, en Sameinuðu þjóðirnar lýstu því formlega yfir árið 2011 að 21. mars væri alþjóðadagur Downs. Dagsetningin er táknræn að því leyti að hún vísar til þess að Downs-heilkennið er orsakað af auka litning í litningi 21,þ.e þremur eintökum af litningi 21.

„Yfirskriftin fyrir daginn í dag er: Hvernig þú sérð mig sem einstakling með Downs-heilkenni. Fólk svarar oft gleði eða bros, og að sjálfsögðu á það við, en einstaklingar með Downs eru svo miklu meira er það. Sonur minn, eins og ég sé hann, er bróðir, sonur og vinur, æfir íþróttir og margt fleira. Þessir einstaklingar eru þátttakendur í samfélaginu eins og við öll," segir Thelma Þorbergsdóttir, meðlimur í Downs-félaginu. Hún hvetur alla til að taka þátt í deginum, meðal annars með því að nota myllumerkið #lotsofsocks.

„Skólarnir eru margir að taka sig saman úti um allan heim og vinnustaðir og annað að mæta í skræpóttum sokkum, en það var meðal annars gert í skólanum hjá stráknum mínum í dag. Og ég var nú búin að skora á Haukaliðið, sem er að spila úrslitaleik í kvöld, að spila í skræpóttum sokkum. Við sjáum til hvað þeir gera," segir Thelma.

Þá munu meðlimir í Downs-félaginu, ásamt vinum og vandamönnum, halda upp á daginn í Laugardalnum í kvöld.

„Við ætlum að hitta alla vini okkar, koma saman, borða góðan mat og Páll Óskar ætlar að koma og svo verður kór sem syngur fyrir okkur og svona."

Í dag er ástæða til að gleðjast. Við gleðjumst yfir stórum og smáum sigrum um leið og við fögnum alþjóðadegi Downs-heilkennis.Til hamingju með daginn.

Posted by Downs félagið on 20. mars 2016

Fögnum Alþjóðlega Downs-deginum á morgun. Deilið endilega myndum af deginum á Instagram með merkinu #downsfelag og...

Posted by Downs félagið on 20. mars 2016

Mánudaginn 21. mars er Alþjóðlegi Down-heilkennis dagurinn. Þar sem nemendur eru komnir í páskafrí þann dag höldum við...

Posted by Seyðisfjarðarskóli on 18. mars 2016

Nemendur í Seyðisfjarðarskóla taka þátt í deginum.