SidekickHealth gerir samning við risavaxna heilsuræktarkeðju

Íslensk-sænska fyrirtækið SidekickHealth hefur gert samkomulag við bandarísku heilsuræktarkeðjuna Curves Jenny Craig (CJC) um verkefni þar sem skorað verður á þúsundir starfsmanna bandarískra fyrirtækja að taka þátt í hóp- og heilsueflingu. CJC er ein af stærstu heilsuræktarkeðjum heims og rekur yfir 700 heilsuræktarstöðvar vítt og breitt um heiminn.

SidekickHealth hugbúnaðarlausnin gerir CJC kleift að bjóða stórum bandarískum vinnustöðum upp á hóp- og heilsueflingu. Starfsfólki er skipt í lið sem keppa innbyrðis í þrjár vikur í heilsueflingu. Í gegnum hugbúnaðinn er um leið hægt að bjóða starfsfólki upp á skimun fyrir heilsufarsvandamálum svo sem hættu á áunninni sykursýki og vísa áfram í frekari úrræði.

SidekickHealth hefur í rúmt ár boðið upp á heilsu- og hópefli fyrir vinnustaði líkt því sem nú er verið að fara af stað með í Bandaríkjunum. Þúsundir starfsmanna fyrirtækja í Svíþjóð, Bretlandi og á Íslandi hafa notað hugbúnaðinn með góðum árangri undanfarið ár. Af viðskiptavinum hér á landi má nefna fyrirtæki svo sem IKEA, VÍS, Vörð, Festi, Össur, RB og Einkaleyfastofuna.

„Meðalnotandinn dregur úr gosneyslu um 65% og er 92% minna líklegur til að neyta sætinda daglega. Við vorum að ljúka við annan heilsueflingarviðburð okkar með VÍS í október og tóku 118 starfsmenn þátt. Á þremur vikum má áætla að sparast hafi sykurneysla sem nemur ríflega 80 kílóum eða þyngd eins fílsunga. Einnig gengu þau 4.762 kílómetra eða sem nemur fjarlægðinni frá Reykjavík til Minnesota í Bandaríkjunum. Það hefur verið ótrúlega skemmtilegt að sjá hve sterk áhrif þetta hefur haft til að ýta undir bætta heilsuhegðun – en til þess var auðvitað leikurinn gerður,“ segir Tryggvi Þorgeirsson, læknir og framkvæmdastjóri SidekickHealth, í tilkynningu.

Fréttin birtist fyrst í Fréttablaðinu.