Einkareknir ljósvakamiðlar slökkva á útsendingum sínum á fimmtudag

Einkareknir ljósvakamiðlar á Íslandi munu slökkva á útsendingum sínum í sjö mínútur fimmtudagskvöldið 1. september næstkomandi.

Þetta verður gert til að árétta ákall forsvarsmanna einkarekinna fjölmiðla á Íslandi um að fjölmiðlalögum verði breytt til þess að jafna samkeppnisstöðu þeirra á íslenskum fjölmiðlamarkaði.

Þetta kemur fram í sameiginlegri tilkynningu frá Arnþrúði Karlsdóttur fyrir hönd Útvarps Sögu, Ingva Hrafni Jónssyni fyrir hönd ÍNN, Rakel Sveinsdóttur fyrir hönd miðla Hringbrautar, Orra Haukssyni fyrir hönd Símans og Sævari Frey Þráinssyni fyrir hönd 365 miðla.

Þar segir að afar mikilvægt sé að einkareknir fjölmiðlar sitji við sama borð og erlendir keppinautar sem nú herji bæði á áskriftar- og auglýsingamarkað á sama tíma og þeir greiða hér hvorki skatta né gjöld. „Þessir miðlar lúta ekki íþyngjandi reglum um meðhöndlun efnis sem innlendir fjölmiðlar gera. Einkareknir miðlar treysta á tekjur af auglýsingasölu til að standa undir starfseminni og því væri öllum til hagsbóta að opinberir fjölmiðlar væru ekki á þeim markaði.

Með breyttri umgjörð gætu fleiri miðlar blómstrað hér á landi, bætt framboð sitt og þar með staðið betur undir þeim kröfum sem til þeirra eru gerðar.

Engar útsendingar verða frá eftirtöldum fjölmiðlum:

Útvarp Saga

ÍNN

Stöð 2

Stöð 3

Bíórásin

Bylgjan

LéttBylgjan

GullBylgjan

FM Extra

FMX

80’s Bylgjan

FM957

X-ið

Sjónvarp Símans

K100

Retro

Sjónvarp Hringbrautar

Útvarp Hringbrautar FM89,1

Ekkert sjónvarp var á fimmtudögum á Íslandi allt til 1. október árið 1987. Mikið vatn hefur runnið til sjávar síðan og öllum ljóst að einkareknir fjölmiðlar gegna viðamiklu hlutverki í umræðu- og afþreyingarumhverfi samfélagsins. Þannig viljum við hafa það áfram. Aðrir einkareknir fjölmiðlar eru því hvattir til að taka þátt í sameiginlegum aðgerðum þann 1. september kl. 21.00,“ segir í tilkynningunni.