Tófan leggst á landsmenn

Pönksveitin Tófa hefur sent frá frá sér nýja breiðskífu, Teeth Richards – þá aðra á innan við ári – deiliskífuna Youdas, myndlistarrit og glænýtt tónlistarmyndband fyrir Iceland Airwaves hátíðina.

Tófa er hjómsveit stofnuð af fimm vinum frá Reykjavík og Colorado. Hana skipa söngkonan Allie Doersch, Andri Freyr Þorgeirsson á bassa, Árni Þór Árnason á baritóngítar, Jóhannes Ólafsson á trommur og Kjartan Holm á gítar. Sveitin hefur starfað í rúm tvö ár en meðlimir hennar hafa leikið með hinum ýmsu hljómsveitum fyrir það, s.s. For a Minor Reflection, Rökkurró og Sigur Rós.

Tónlist Tófu er villt, hrá og ljóðræn. Andrúmsloftið er kaótískt en sækir innblástur jafnt í 20. aldar bókmenntir og myrkari hliðar samtímans. Rétt eins skepnan sem hún heitir eftir er Tófa álitleg að sjá en þegar betur er að gáð er hún taumlaus og blóðþyrst.

Fyrir Airwaves-hátíðina 2015 sendi Tófa frá sér sína fyrstu plötu, Fleetwood Max, sem vakti nokkra athygli í jaðartónlistarkreðsum. Nú, innan við ári seinna, hefur hún sent frá sér aðra breiðskífu, Teeth Richards, sem hægt er að sækja á Bandcamp-svæði hljómsveitarinnar þar sem hlustandinn ræður hvað hann borgar auk þess sem hægt er að streyma plötunni á öllum helstu veitum.

Á Teeth Richards setur sveitin undir sig hausinn og ræðst á pönkgarðinn þar sem hann er hæstur. Þar eru hugmyndir sem spruttu fram á fyrri plötunni rannsakaðar og færðar út, auk þess sem elja lögð í að setja lögin saman á frumlegan og ferskan máta. Platan samanstendur af átta lögum sem tjá gremju, valdaleysi og heimshryggð ungmenna sem lifa og hrærast í Reykjavík en þó aldrei án þeirra skilaboða að nú skuli taka til sinna ráða, breyta og bæta samfélagið. Textarnir eru ljóðrænir og stundum óræðir, fullir af vísunum og femínisma.

Tófa er með mörg járn í eldinum en auk Teeth Richards kemur út fyrir Airwaves-hátíðina sjö tommu deiliskífa (e. split) með bandarísku hljómsveitinni Deletions, glænýtt tónlistarmyndband og handgert myndlistarrit fullt af ýmsum varningi og tónlist í afar takmörkuðu upplagi. Deiliskífuna og myndlistaritið má finna í völdum plötuverslunum á næstu dögum.

Myndbandið má sjá hér að neðan og það við lagið, You’re done, af fyrrnefndri deiliplötu og unnið af Tófu með hjálp vina og vandamanna.

Áhugasamir geta séð Tófu á tónleikum í Airwaves-vikunni á eftirtöldum stöðum:

Mánudag 31. október – 17:30 – Lucky Records

Miðvikudag 2. nóvember – 18:00 – Kaffibarinn

Fimmtudag 3. nóvember – 17:30 – Hitt Húsið (sérstakir jógatónleikar þar sem pönkið víkur fyrir sveimandi tónum)

Fimmtudag 3. nóvember – 18:30 – 12 Tónar

Föstudag 4. nóvember – 14:30 – Loft Hostel

Föstudag 4. nóvember – 16:00 – Hlemmur Square

Laugardagurinn 5. Nóvember  20:00 – Gaukurinn (on-venue)