Tvö og hálft ár í fangelsi: Reyndi að nauðga tveimur konum á fimm mínútum í miðbæ Reykjavíkur

Kolbeinn Tumi Daðason skrifar 11. september 2016 09:00

Fyrri nauðgunartilraunin var í Tjarnargötu um klukkan þrjú að næturlagi. Vísir/KTD

Karlmaður á fimmtugsaldri hefur verið dæmdur í tveggja og hálfs árs fangelsi fyrir tilraun til að nauðga tveimur ungum konum með nokkurra mínútna millibili í miðbæ Reykjavíkur í desember síðastliðnum. Fjölskipaður Héraðsdómur Reykjavíkur komst að þessari niðurstöðu í júní.

Maðurinn, Dómald Leó Burknason, var úrskurðaður í gæsluvarðhald í desember og var í varðhaldi allt þar til dómur féll í máli hans 22. júní enda þótti ekki forsvaranlegt að maður undir svo sterkum grun um alvarleg brot gengi laus á meðan málið væri í rannsókn. Dómald þarf að greiða konunum hvorri fyrir sig eina milljón króna í miskabætur.

Tilraunirnar til nauðgana áttu sér stað í Tjarnargötu annars vegar og Þingholtsstræti hins vegar um þrjúleytið aðfaranótt sunnudagsins 13. desember. Maðurinn neitaði lengi vel sök og kannaðist ekki við að hafa ráðist á konurnar. Hann hefði verið mjög ölvaður umrætt kvöld eftir drykkju frá lokum vinnudags og frameftir. Hann ræki ekki minni til þess sem hann væri sakaður um. Aðspurður um för á höndunum sem virtust eftir klór sagðist hann starfa við viðgerðir á bílum þar sem ekki liði sá dagur þar sem hann bæri þess merki á höndunum.

Skipti um skoðun undir lokin

Undir lok aðalmeðferðar var Dómald spurður hvort hann vildi taka eitthvað fram eftir að hafa verið viðstaddur alla aðalmeðferð málsins. Kvaðst hann þá ekki lengur draga í efa að hann hefði verið í Tjarnargötunni á þeim tíma sem árásin varð. Hann væri í sjokki vegna þess og myndi ekki eftir kvöldinu vegna ölvunar.

Dómald sagðist ekki vera vera ofbeldishneigður og hann tryði því ekki að kynferðisofbeldi hafði verið haft að leiðarljósi. Nánar spurður játaði Dómald, í ljósi vitnisburðar og fyrirliggjandi gagna, að hafa ráðist á báðar konurnar. Hann neitaði því að hafa gert það í því skyni að beita þær kynferðisofbeldi. Hann myndi ekki eftir atburðunum og vissi ekki hvað honum hefði gengið til.

Fjölskipaður héraðsdómur komst hins vegar í báðum tilfellum að þeirri niðurstöðu að ekki væri aðeins um líkamsárás að ræða heldur tilraun til nauðgana. Var vísað til þess að í hvorugt skiptið hefði hann látið af háttsemi sinni fyrr en fólk bar að garði.

Húsasundið í Tjarnargötu þar sem Dómald sat fyrir konunni.Vísir/KTD

Fann gat á buxunum og reif þær af henni

Fyrri árásin átti sér stað í Tjarnargötunni en tilkynningu um hana barst lögreglu klukkan 03.05 um nóttina. Á vettvangi hitti lögreglan fyrir rúmlega tvítuga konu sem var í miklu uppnámi. Hún sat í snjónum í rifnum buxum og grét. Hún lýsti því að hún hafi verið að ganga heim úr bænum þegar hún tók eftir manni sem gekk fyrir aftan hana á Tjarnargötunni. Hann gekk mjög nálægt henni, hún hafi orðið hrædd og gengið stóran hring og leyft manninum að ganga fram úr sér.

Maðurinn hafi horfið inn á milli húsa í götunni og hafi unga konan talið hann vera búsettan þar og haldið göngu sinni áfram. Þegar hún gekk framhjá umræddu húsi hafi hann svo gripið í hana, skipað henni að láta sig hafa símann og talað við hana á ensku.

Konan greip til þess ráðs að henda frá sér símanum í þeirri von að maðurinn væri að reyna að ræna hana og myndi elta símann. Þegar hún sá að maðurinn vildi ekki símann hafi hún talið hann ætla að nauðga sér. Maðurinn skipaði henni á ensku að þegja, reif í hár hennar og greip fyrir munn. Hún hefði verið með trefil um hálsinn sem hann hafi hert að en hún náð að smeygja sér úr treflinum.

Í framhaldinu fór maðurinn að snerta hana í klofinu og á innanverðu læri þar sem hann fann gat á buxunum. Stakk hann fingri í gatið og reif buxurnar af henni. Stúlkan hafi þá öskrað eins hátt og hún gat en hún sagði lögreglu að hún hafi verið þess fullviss að maðurinn ætlaði að nauðga henni. Hann hafi verið harkalegur við hana en hún öskraði meira og þá kom par sem var á göngu á Suðurgötu að þeim. Við það hafi maðurinn farið.

Við læknisskoðun á konunni kom í ljós skrapsár á enni, bæði hægra og vinstra megin og vott af glóðurauga. Auk þess skrapsár á hendi.

Mynd sem lögreglan óskaði eftir að birt yrði í fjölmiðlum af meintum árásarmanni. Dómald gaf sig fram við lögreglu daginn eftir.mynd/lrh

Ýtti stúlkunni utan í bíl og reyndi að setjast klofvega yfir hana

Aðeins fimm mínútum eftir að tilkynning um þessa árás barst lögreglu tilkynning um aðra árás á stúlku í Þingholtsstræti. Þar hafi lögreglan hitt stúlkuna sem var grátandi og í miklu uppnámi. Hún lýsti því að hafa verið ein á gangi upp Bankastrætið þegar maður hafi komið aftan að henni og lagt hendi yfir axlir hennar. Maðurinn hafi svo gripið fastar og fastar utan um hana og hún reynt að losa sig en hann hafi þá gripið um munn hennar og gengið ákveðið með hana inn Þingholtsstrætið.

Þau hafi ekki verið komin langt inn götuna þegar maðurinn hafi svo kastað henni utan í bíl sem lagt var í Þingholtsstræti og reynt að setjast klofvega yfir hana þar sem hún lá á jörðinni. Kvaðst stúlkan að sér hefði liðið allan tímann eins og hann ætlaði að nauðga henni en síðan hafi líklega einhver komið að því allt í einu hafi maðurinn hlaupið í burtu.

Hélt hann sem leið lá upp Bankastrætið, niður Ingólfsstræti þar sem hann stökk upp í leigubíl. Leigubílstjórinn sagði fyrir dómi að maðurinn hefði komið nokkuð æstur inn í bílinn en þeir hefðu ekkert ræðst við í bílnum. Eiginkona mannsins sagði hann líklega hafa komið heim á bilinu hálf þrjú til þrjú. Þegar borin voru undir hana upplýsingar um leigubílaferð mannsins þá sagði hún vel geta verið að hann hefði komið heim 3:24, eins og upplýsingar frá leigubílastöðinni báru um.

Unga konan var með klórför undir auga og á nefbroddi. Þá sást bólga á hnjám sem þótti mega rekja til þess þegar maðurinn ýtti konunni í jörðina.

Síðari árásin var í Þingholtsstræti.Vísir/KTD

Síðari árásin öll til á upptöku

Á meðal gagna í málinu voru upptökur úr eftirlitsmyndavélum miðbæjarins þar sem maðurinn sást á gangi í Tjarnargötu og þá er seinni árásin öll til á upptöku.

Myndir úr myndavélunum voru birtar í fjölmiðlum þann 16. desember að beiðni lögreglu. Fjöldi ábendinga barst lögreglu og hafði meðal annars vinnufélagi mannsins samband. Þá sagði kona mannsins hafa hvatt hann til að gefa sig fram við lögreglu sem hann gerði að morgni 17. desember.

Maðurinn sagðist líkjast manninum á myndunum en gat ekki staðfest að um hann væri að ræða. Grunur þótti þó það mikill að hann var handtekinn á staðnum og úrskurðaður í gæsluvarðhald. Varðhaldið var endurtekið framlengt allt þar til dómur féll í málinu í júní. Sá tími sem Dómald var í gæsluvarðhaldi dregst frá dómnum og á hann því eftir tæplega tvö ár af dómi sínum.