Innlent

Erling biður aðdáendur afsökunar og er hættur við að hætta

Kolbeinn Tumi Daðason skrifar
Erling með kakkalakka frá Madagaskar.
Erling með kakkalakka frá Madagaskar. Mynd af síðu Erlings, Heimi Smádýranna
„Úff, ég hélt að þetta yrði einfalt, gerði ekki ráð fyrir að mín yrði saknað svo mjög hér á þessum vettvangi,“ segir Erling Ólafsson, skordýrafræðingur á Náttúrufræðistofnun Íslands. Erling hefur haldið úti síðunni Heimur smádýranna á Facebook og kynnt fylgjendum sínum fyrir hinum ýmsu skordýrum.

 Meðal þeirra sem hafa verið kynnt til leiks undanfarnar vikur eru Ryðhumla, netlufiðrildi, skógburstinn og krossköngulóin. Hafa skrif hans vakið góð viðbrögð netverja en Erling birtir fallegar myndir af skordýrunum og segir frá þeim á einstakan hátt. Því krossbrá mörgum lesandanum þegar hann tilkynnti í gærmorgun að hann ætlaði að láta staðar numið

 „Viðbrögð við ráðgerðu brotthvarfi mínu af leikvellinum hafa tendrað hjá mér logandi samviskubit! Auk kommenta hér hafa mér borist hvatningarorð víða að um að halda síðunni gangandi áfram, til vara að loka henni ekki. Óvirkar síður þykja mér hins vegar ekki áhugavekjandi og ekki á vetur setjandi.“

 Erling segist hafa lagst undir feld eins og Þorgeir Ljósvetingagoði forðum, sé nú skriðinn undan honum og tekið þá ákvörðun að hætta við að hætta og blása til seinni hálfleiks.

 „Síðan var stofnuð fyrir rúmum þrem árum og ég á rúm þrjú ár eftir í starfi mínu hjá Náttúrufræðistofnun Íslands. Starfið þar hefur lagt grunninn að þeim fróðleik sem hér er á borð borinn. Það eru ávextir Náttúrufræðistofnunar sem menn fá að njóta hér. Engu verður samt um það lofað að seinni hálfleikur verði þeim fyrri jafnlangur. Næsta padda verður væntanlega kynnt til sögu síðar í dag.“

 Um 3400 manns fylgja Erling í Heimi smádýranna.

Mest lesið


Fleiri fréttir

Sjá meira


×

Mest lesið