Lauf Forks sigursælir á Eurobike

Íslenska frumkvöðlafyrirtækið Lauf Forks vann til verðlauna á alþjóðlegu Eurobike hjólasýningunni í Þýskalandi í gærkvöldi. Voru verðlaunin í flokki bestu hjólaíhluta, en demparagaffall fyrirtækisins, Lauf Grit, þótti skara fram úr á sínu sviði.

Sérhannað fyrir malarhjólreiðar

Fyrirtækið hefur unnið að þróun demparagafla frá stofnun þess árið 2011, en fyrir þá sem ekki þekkja til þá er gaffallinn sá hluti hjólsins sem heldur framdekkinu á sínum stað og getur verið mismunandi eftir tegund og tilgangi hjólsins.

Í samtali við Vísi segir Benedikt Skúlason, framkvæmdastjóri og einn stofnenda fyrirtækisins, gafflana vera eins konar millistig á milli hefðbundinna, þungra demparagaffla og stífra og léttra gaffla.

„Hingað til hefur ekki verið nein lausn sem dekkar þann markað sem er þarna á milli, þegar þú ert hvorki á fleygiferð niður fjallshlíð né að hjóla á silkismurðu malbiki, heldur til dæmis á malarvegi. Það er í raun ekkert annað konsept á markaðnum í dag sem mætir þessari þörf eins og okkar vara,“ segir Benedikt.

Þá segir hann þróunina hafa áður snúið meira að hefðbundnum demparagöfflum gerðum fyrir fjallahjól, sem gekk að sögn vel, en eftir því sem tímanum leið kom sífellt betur í ljós að helsta gatið á markaðnum lægi í sérhönnuðum göfflum fyrir malarhjólreiðar.

Benedikt segir að það sé klárlega markaður fyrir sérhannaða lausn á borð við Lauf Grit hér á landi, en varan sé til að mynda mjög hentugur valkostur fyrir hina árlegu Bláa Lóns Áskorun. Bláa Lóns Áskorunin, eða Blue Lagoon Challenge, er ein stærsta fjallahjólakeppni á Íslandi en í henni er hjóluð 60 kílómetra leið, frá Völlunum í Hafnarfirði og að Svartsengi í Grindavík.

Stór hluti þeirrar leiðar liggur einmitt yfir malarvegi og lausan sand. „Þetta er mjög þægilegt fyrir svoleiðis ferðir, þegar þú vilt hvorki vera með vesenið og þyngdina af stórum demparagaffli, né vera á einhverju alveg pinnstífu og óþægilegu,“ segir Benedikt.

Verðlaunin eru ákveðinn gæðastimpill

Segir Benedikt verðlaunin hafa mikla þýðingu fyrir fyrirtæki sem er að reyna að koma sér á framfæri á alþjóðlegum markaði, og gætu þau hjálpað þeim að komast í samband við stærri hjólafyrirtæki sem myndu þá vilja taka inn vöruna.

„Sérstaklega því þetta er vara sem þarfnast ákveðinnar viðurkenningar því að hún er aðeins öðruvísi. Flestir í hjólabransanum eru að selja mjög keimlík hjól, sem eru bara með einhverjum smáatriðamuni. Fólk er þá auðvitað ekkert að efast um að það virki bara, og hefur kannski verið pínu hrætt við að nota svona framandi konsept sem það hefur ekki hugmynd um hvort að virki. Þessi verðlaun og það að fleiri og fleiri stærri merki eru að taka þetta inn í sínar línur eru svona ákveðinn gæðastimpill.“

Eurobike er ein stærsta hjólasýning heims en hún er haldin árlega í Friedrichshafen í Baden-Württemberg í Suður-Þýskalandi. Þar geta leiðandi framleiðendur og sprotafyrirtæki í bransanum kynnt sínar vörur, en samkvæmt skipuleggjendum Eurobike koma saman á sýningunni á milli 60 og 70 þúsund hjólaunnendur, bransafólk og fréttamenn á hverju ári.

„Þetta er alveg risastórt. Þetta eru eins og svona tuttugu Laugardalshallir og svo er allt útisvæðið í kring notað líka. Stærstu merkin byggja sér sýningarhús á tveimur hæðum sem eru svo bara rifin niður þegar sýningin er búin eftir fjóra daga. Þetta er frekar klikkað,“ segir Benedikt að lokum.