Skytta Valsmanna nef- og kinnbeinsbrotin eftir fólskulega árás við b5

Ferðamaður frá Kanada hefur verið dæmdur í þriggja mánaða skilorðsbundið fangelsi í Héraðsdómi Reykjavíkur fyrir fólskulega líkamsárás á handknattleiksmann úr Val við skemmtistaðinn b5 við Bankastræti 5 í Reykjavík um síðustu helgi. Hann þarf að greiða Valsmanninum rúma hálfa milljón króna í skaðabætur.

Karlmaðurinn var handtekinn í miðbænum skömmu eftir árásina og í kjölfarið úrskurðaður í tveggja vikna farbann. Dómur var svo kveðinn upp í dag en hann játaði brot sín skýlaust.  Hann var sakaður um að hafa slegið Króatann Josip Juric Grgic, sem fenginn var til Valsmanna sem rétthent skytta, hnefahöggi í andlitið með þeim afleiðingum að Grgic meðal annars nef- og kinnbeinsbrotnaði.

Dóminn í heild sinni má lesa hér.

Fórnarlambið frá í nokkrar vikur

Óskar Bjarni Óskarsson, þjálfari handboltaliðsins í Val, segir flest benda til þess að Grgic verði frá næstu vikurnar, en keppni í Olísdeild karla í handknattleik hófst í gærkvöldi. 

„Hann er mjög illa nefbrotinn þannig að hann verður eitthvað frá, en það er óvíst hversu lengi. Það er alltaf einhver tími, að minnsta kosti tvær vikur myndi ég halda, kannski lengur,“ segir Óskar í samtali við Vísi. Hann bætir við að um sé að ræða afar leiðinlegt atvik fyrir alla aðila.

„Þetta er mikið áfall og alltaf leiðinlegt þegar svona gerist, bæði fyrir félagið og hann sjálfan. Þetta er slæmt mál, það verður bara að segjast eins og er:“ 

Grgic er 21 árs og skrifaði undir samning við Val þann 12. ágúst síðastliðinn. Hann er rétthent skytta sem spilaði í Dubai á síðasta tímabili. 

Orðaskipti milli þriggja leikmanna og árásarmannsins

Aðspurður um tilefni árásarinnar segist Óskar eiga erfitt með að svara því. Hins vegar viti hann til þess að mennirnir tveir hafi átt í einhverjum stympingum fyrr um kvöldið.

„Það voru tveir leikmenn frá okkur með honum þetta kvöld. Í sjálfu sér var enginn svakalegur aðdragandi að þessu, en eitthvað smotterí sem hafði staðið yfir í einhvern smá tíma. Einhver smávægileg rifrildi skilst mér,“ segir Óskar. 

Þá segir hann Valsmenn koma til með að styðja þétt við bakið á leikmanni sínum. 

„Þetta er ungur drengur og svona lagað getur gerst. Þetta er mjög óheppilegt, fyrir hann og okkur svona í upphafi móts, en við stöndum við bakið á stráknum. Það er bara þannig,“ segir Óskar Bjarni.

Valsmenn sækja FH heim í fyrstu umferð Olísdeildarinnar á sunnudagskvöldið. Þeir binda töluverðar vonir við skyttuna sem var í silfurliði Króata á HM tuttugu ára landsliða. 

Að neðan má sjá samantekt með tilþrifum Grgic.