Ólíðandi að hjólreiðamenn verði fyrir árásum

Garðar Þór Magnússon var að hjóla heim frá vinnu á sjötta tímanum í gær þegar hann varð þess var á síðustu stundi að snæri var strengt þvert yfir brúna við Kópavogslæk. Annar hjólreiðamaður var þar fyrir að reyna að losa niður snærið.

„Ég næ ekkert að bremsa, ég næ bara að beygja mig og finn spottann fara í hjálminn og eftir bakinu á mér. Svo sný ég við þegar ég kem hér út af brúnni og hjálpa fólkinu að skera niður spottann," segir Garðar Þór.

Strengt í höfuðhæð

Ofan af Kópavogshálsinum kemur fjöldi hjólreiðamenn á háannatíma, sumir á allt að 20-30 km hraða. Því má rétt ímynda sér afleiðingarnar af því að lenda á strengdu snæri, í höfuð- eða brjósthæð, á slíkri ferð. „Það er ljótt að segja, en það gæti orðið bara afhöfðun ef maður lendir á þessu,“ segir Garðar sem var skiljanlega brugðið. 

„Þegar ég kom heim þá bara sauð á mér, ég var foxillur yfir þessu alveg. Þetta er ekki í fyrsta sinn hérna í Kópavogi sem þetta gerist. Ég veit ekki hvað skal gera til þess að koma í veg fyrir þetta."

Vegfarendur hvattir til að tilkynna lögreglu

Að minnsta kosti þrjú önnur dæmi hafa komið upp í sumar þar sem snæri hafa verið strengd yfir stíga með þessum hætti. Lögreglan lítur málið mjög alvarlegum augum og biður vegfarendur að tilkynna um öll slík tilfelli.

Fyrir tveimur árum slasaðist hjólreiðamaður illa þegar hann lenti á vír sem hafði verið strengdur yfir brú við ósa Elliðaár.

Sjá einnig: Telur sig hafa sloppið vel frá því að hjóla á vír við Elliðaár

Gangandi og hjólandi í sátt og samlyndi

Hjólreiðar hafa aukist mjög síðustu ár og Garðar Þór segir að umferðarmenningin verði að vera þannig að gangandi og hjólandi séu í sátt og samlyndi. Hinsvegar sé ólíðandi að hjólreiðamenn þurfi að búa við hættu af árásum frá samborgurum sínum.

„Maður á stundum fullt í fangi með að gæta sín á bílunum og hundunum, svo bætast spottarnir við. Það er ekki eitthvað sem maður vill sjá í þessu."