Sleppur með lágmarksrefsingu fyrir nauðgun: „Mjög pirraður út í helvítis tíkina“

Austin James Wilkerson 22 ára nemi í University of Colorado í Bandaríkjunum var í liðinni viku fundinn sekur um að nauðga 19 ára stúlku í mars 2014. Hann hlaut þó afar vægan dóm vegna glæpsins en málið hefur vakið nokkra athygli í Bandaríkjunum enda þykir því svipa mjög til annars nauðgunarmáls í bandarískum háskóla sem dæmt var í fyrr á þessu ári. Þá var Brock Turner dæmdur í sex mánaða fangelsi fyrir að nauðga stúlku á skólalóð Stanford-háskóla og vakti dómurinn mikla reiði.

Wilkerson, sem braut gegn stúlkunni þegar hún var hjálparvana og hálfmeðvitundarlaus, hlaut tveggja ára dóm og 20 ár á skilorði. Refsingin felst í því að hann þarf að gista í svokölluðu sýslufangelsi í tvö ár en má sækja vinnu eða nám utan veggja þess. Í lögum er hins vegar heimild til að dæma menn sem gerast sekir um nauðgun í fjögurra til tólf ára fangelsisvistar í ríkisfangelsi. Dómaranum í málinu fannst hins vegar ekki rétt að gera það en fólk sem hefur framið minniháttar glæpi er frekar dæmt til refsingar í sýslufangelsum í Bandaríkjunum.

Þóttist ætla að hjálpa henni en fór með hana á afvikinn stað og braut á henni

Kviðdómur komst að þeirri niðurstöðu að Wilkerson hefði brotið kynferðislega gegn stúlkunni en saksóknarar sögðu hann hafa farið með hana á afvikinn stað og nauðgað henni þar sem hún var hálfmeðvitundarlaus. Áður en Wilkerson fór með henni hafði hann sagt vinum sínum að hann ætlaði að hugsa um hana þar sem hún var ekki í góðu ástandi.

Á endanum viðurkenndi Wilkerson að hafa haft mök við stúlkuna á meðan hann fékk ekki mikil viðbrögð frá henni, eins og það er orðað í umfjöllun Guardian um málið. Saksóknarar segja niðurstöðuna mikil vonbrigði enda höfðu þeir krafist þess að Wilkerson yrði dæmdur til fangelsisvistar.

„Þetta hjálpar okkur ekki í baráttunni gegn einum versta glæp kynbundins ofbeldis í samfélaginu. Árið 2016 eigum við ennþá mikla vinnu óunna,“ segir Caryn Datz einn af saksóknurum í málinu.

Í máli saksóknaranna kom fram að Wilkerson hefði ekki aðeins þóst ætla að hjálpa stúlkunni heldur sendi hann vinkonu hennar skilaboð eftir að hann misnotaði hana þar sem hann kvaðst hafa aðstoðað stúlkuna og vinkonan þakkaði honum fyrir. Stúlkan var, líkt og Wilkerson, nemandi í University of Colorado, en hún var á fyrsta ári. 

Reyndi við hana en hún vildi ekkert með hann hafa

Þá sagði Wilkerson rannsakanda sem kom að málinu fyrir hönd háskólans að hann hefði reynt við stúlkuna allt kvöldið en hún ekkert viljað með hann hafa. Hann sagðist hafa verið „mjög pirraður út í helvítis tíkina,“ að sögn saksóknara.

Hann hefði síðan viðurkennt glæpinn fyrir vinum sínum og fyrir rannsakendum áður en réttarhöldin hófust en breytti framburði sínum fyrir dómi.

„Ákærði nauðgaði hjálparvana stúlku... reyndi að hylma yfir glæpinn, og laug síðan ítrekað um hvað hann gerði, meðal annars fyrir dómi,“ skrifuðu saksóknarar í greinargerð.

Áður en dómurinn var kveðinn upp sagði dómarinn að hann hefði átt í miklum vandræðum með að ákveða refsinguna.

 

„Ég hef átt í erfiðleikum með spurninguna „Á ég að dæma hann til fangelsisvistar?“ Ég veit að það er ekki nein frábær niðurstaða fyrir neinn. Wilkerson á skilið refsingu en ég held að við þurfum öll að átta okkur hvort hann geti í raun notið endurhæfingar eða ekki,“ sagði dómarinn og kvað svo upp dóm sinn.