Dunkin Donuts svara Aðalheiði: „Nóg framboð af sjálfskipuðum sérfræðingum sem telja að þeirra skoðun sé skoðun allra“

„Við skiptum okkur ekki af rekstri Kaffitárs en ég bendi á að við hjá 10-11 rákum Inspired By Iceland verslun í brottfararsal flugstöðvarinnar og rétt eins og Kaffitár þá töpuðum við í útboðinu árið 2014,“ segir Sigurður Karlsson, framkvæmdastjóri matvörusviðs Basko sem á og rekur verslanir 10-11 og kaffihús Dunkin´Donuts, í tilkynningu þar sem hann svarar orðum Aðalheiðar Héðinsdóttur, forstjóra Kaffitárs, um opnun Dunkin´ Donuts í komuverslun flugstöðvar Leifs Eiríkssonar.

Aðalheiður sagði í samtali við Vísi í gær að að það sé fyrst og fremst sorglegt að Dunkin´ Donuts sé að opna í flugstöðinni og að fólk vilji almennt hafa flugstöðina íslenska.

Kaffitár rak tvo kaffibari í flugstöðinni, en samningur við þau var ekki endurnýjaður árið 2014 og Joe and the Juice kom í staðinn.

„Auðvitað vorum við ósátt en ákváðum að bregðast þannig við að styrkja okkur frekar á öðrum sviðum og halda áfram að berjast. Í viðskiptum er ekki hægt að ætlast til þess að maður sigri alla bardaga sem farið er í. Maður þarf að velja í hvað maður setur orkuna sína og ef þeim hjá Kaffitári finnst henni best varið í að tala niður önnur fyrirtæki þá er það þeirra mál,“ segir Sigurður.

Fjöldi erlendra ferðamanna fer í gegnum flugstöðina á hverjum degi og hefur því ferið fleygt fram að slíkir hafi lítinn áhuga á að sjá erlend vörumerki eins og Dunkin Donuts hér á landi. „Þetta heyrðum við oft áður en við opnuðum Dunkin á Laugaveginum en eins og ég sagði áðan þá viljum við að viðskiptavinir okkar hafi val. Það er nóg framboð af sjálfskipuðum sérfræðingum sem telja að þeirra skoðun sé skoðun allra. Í verslun Dunkin Donuts á Laugaveginum eru um það bil 70% allra viðskiptavina okkar erlendir gestir og höfum við fengið jákvæð viðbrögð og sýnir það sig meðal annars með endurteknum komum þeirra á meðan á dvölinni á Íslandi stendur,“ segir Sigurður.

10-11 hefur rekið verslun í komusal flugstöðvar Leifs Eiríkssonar frá árinu 2006 og þegar sérleyfissamningur við Dunkin Donuts var undirritaður var eitt af tækifærunum sem forsvarsmenn Basko sáu að opna Dunkin inni í komuversluninni.

„Nú standa yfir breytingar og hluti af þeim breytingum er að við ætlum að bjóða viðskiptavinum okkar upp á veitingar frá Dunkin. Ásamt því að vera með hágæða kaffi, kleinuhringi og aðrar veitingar frá Dunkin Donuts verður einnig opnað eldhús undir merkjum Ginger. Þar verður heilsufæði eldað á staðnum, eins og kjúklingaréttir, salöt, vefjur og boost. Með þessu gefum við viðskiptavinum okkar breiðara úrval af veitingum á mjög hagstæðu verði, en eitt af því sem við höfum lært af rekstri okkar er einmitt það að viðskiptavinurinn vill hafa val. Við áttum okkur á því að það er viðskiptavinurinn sem ræður og við aðlögum okkur að því“  segir Sigurður Karlsson, framkvæmdastjóri matvörusviðs Basko.