Vilja nýta horn kinda til að búa til hundamat

Stefnt er að því að framleiða hundafóður úr kindahornum í Bolungarvík. Samkvæmt heimildum Fréttablaðsins er um að ræða verkefni sem unnið er í samvinnu við erlenda aðila. Ferlið hófst fyrir tveimur árum og hefur verið unnið að undirbúningnum hér á landi á þeim tíma.

Um er að ræða tilraunaverkefni. Framleiðslan var fyrst á Húsavík og stóð þar yfir frá hausti eftir sláturvertíðina 2014 og fram á fyrravor. Verið er að vinna í því að færa þá starfsemi til Bolungarvíkur.

Starfsemin verður til húsa í gamla frystihúsi Einars Guðfinnssonar, húsi Íshúsfélags Bolungarvíkur. Húsnæðið er í eigu rækjuverksmiðjunnar Kampa ehf. Í húsinu er fyrir þurrkverksmiðja fyrir rækjuskel, og mjólkurvinnslan Arna er þar einnig til húsa.

Nokkur fyrirtæki framleiða í dag hundafóður á Íslandi. Fyrirtækið Hundahreysti framleiðir til að mynda ferskfóður þar sem notað er hrátt íslenskt kindakjöt, nautavambir og nautablóð. Öll framleiðslan er íslensk. Iceland Pet (í eigu Lýsis) framleiðir einnig hunda- og kattamat í Þorlákshöfn. Vörurnar eru unnar úr íslenskum fiski og er um að ræða bæði þurrmat og blautmat.

Sérstaða hundafóðursins í Bolungarvík er sú að það verður framleitt úr kindahornum. Fram að því að fyrirtækið að baki framleiðslunni kom með þá hugmynd að nýta kindahorn til fóðurs hafði það tíðkast að greitt var fyrir að farga þeim. Hugmyndin er því að endurnýta eitthvað sem annars væri fargað.

Óljóst er hvenær vinnsla geti hafist eða hve mörg störf verði til í Bolungarvík í kjölfarið. Samkvæmt heimildum Fréttablaðsins eru viðræður enn í gangi við innlenda aðila um samstarf vegna framleiðslunnar.

Þessi frétt birtist fyrst í Fréttablaðinu þann 9. ágúst 2016.