Miðar á Quarashi að seljast upp

Miðar á tónleika Quarashi á Nasa á föstudaginn eru við það að seljast upp. Framkoma þeirra á Þjóðhátíð í Eyjum vakti mikla lukku og mikill hiti er innan sveitarinnar að sögn Steinars Fjeldsted rappara.

„Það er gaman að spila svona tónleika í bænum. Það er allt öðruvísi en Dalurinn þó svo að hann sé æðislegur líka,“ segir Steini. „Ég hlakka til að fá að finna svitalyktina og geta tekið alvöru stagedive.“

Fyrstu tónleikarnir í Reykjavík í 5 ár

Sveitin hefur ekki spilað í Reykjavík síðan árið 2011 en þá hélt sveitin tvenna tónleika stuttu eftir að þeir komu fram á Bestu útihátíðinni það sama ár.

Liðsmenn Quarashi gáfu frá sér í sumar lagið Chicago sem hefur fengið góða spilun í útvarpi í sumar. Nú sem stendur eru liðsmenn að vinna að upptöku fleiri laga og býst Steini við því að út komi þröngskífa í föstu formi áður en árið er úti. Hann býst þó ekki við því að sveitin taki mikið af nýju lögunum á tónleikunum á föstudag.

„Það er gaman að spila þessi gömlu lög, þau eru svoldið nálægt hjarta manns. Þetta eldist ágætlega og það er kominn alveg nýr hópur sem er að hlusta. Við tökum nú samt örugglega Chicago en við erum bara að klára hin lögin. Ég geri lítið annað þessa daganna en að ala upp börn og semja texta.“

Shades of Reykjavík og GKR sjá um upphitun.

Miðasala fer fram á tix.is en aðeins örfáir miðar eru eftir.

Hér fyrir neðan má sjá stutt myndskeið af því hvernig stemmningin var á sviðinu í Eyjum að tónleikum loknum.