Kardashian-systur tryggja sér Gyðjuúr

Sigrún Lilja Guðjónsdóttir, hönnuður Gyðju Collect­ion, er vægast sagt í skýjunum um þessar mundir en hún sendi nýverið armbandsúr úr nýjustu línunni sinni til systranna Kylie Jenner og Khloe Kardashian. Þetta er í annað skiptið sem Gyðja gefur út úr en fyrri línan kom út fyrir tveimur árum og sló þá rækilega í gegn.

„Varan var vart komin þegar úrið í rósagulli var uppselt. Núna eigum við aðeins örfá eintök af hinum týpunum en við önnum varla eftirspurn. Við erum núna bara að bíða eftir annarri framleiðslu og erum strax komin með langan forpöntunarlista,“ segir Sigrún en hún hefur vakið mikla athygli í gegnum tíðina fyrir merkið sitt.

Þegar hún var að fara af stað með úrin setti hún sig í samband við teymið sem starfar fyrir Kylie Jenner í von um að selja henni úr. „Ég var áður mikið í Los Angeles að byggja upp tengslanet enda skiptir markaðssetningin öllu máli. Kylie varð fyrst til þess að tryggja sér eintak en hún fékk sér tvö. Eitt með rósagulli og hitt gyllt. Í kjölfarið tryggði teymi Khloe Kardashian henni einnig tvö úr. Eitt svart og gyllt og annað gyllt eins og systir hennar.“

Í seinustu viku bættist svo stórleikkonan Sofia Vergara við kúnna­hóp Gyðju Collection. „Sofia er kólumbísk og dökk á hörund. Því passaði henni vel að taka úr í perluhvítu og brons.“ Það verður spennandi að sjá hvort fleiri stjörnur fá sér Gyðjuúrin þegar nýja sendingin kemur, en Sigrún Lilja á von á henni á næstu vikum.

Spurð út í hver draumakúnninn hennar væri þá þurfti Sigrún ekki lengi að hugsa sig um: „Ég elska Angelinu Jolie og hef alltaf elskað hana. Það væri algjör draumur að sjá hana bera vöruna mína og það rætist vonandi einn daginn.“

Um þessar mundir er Sigrún Lilja að vinna í því að koma Gyðju inn á markað í Bretlandi en hún hefur verið að mynda sér tengslanet þar í landi. „Við erum búin að vera að vinna stöðugt að þessu í marga mánuði og nú fer þetta að bresta á. Við stefnum á að fara inn í nokkrar búðir þar og svo er aldrei að vita hvort við opnum okkar eigin í framtíðinni.“ Hægt er að nálgast Gyðju Collection í verslun þeirra í Firðinum, Hafnarfirði og á netverslun Gyðja Collection.

Fréttin birtist fyrst í Fréttablaðinu 4.júlí.