Fyrrverandi bæjarstjóri nýr hafnarstjóri

Lúðvík Geirsson, fyrrverandi bæjarstjóri í Hafnarfirði, hefur verið ráðinn hafnarstjóri bæjarins. Samþykkti hafnarstjórn á fundi ráðsins í morgun að ráða Lúðvík til starfans.

Valnefnd sem skipuð var til að ráða nýjan hafnarstjóra komst að þeirri niðurstöðu að hann væri hæfastur. „Að mati valnefndarinnar leiðir reynsla, þekking og menntun sem og leiðtoga- og samstarfshæfni Lúðvíks til þess að hann er talinn vera hæfastur umsækjenda í starfið. Önnur gögn, svo sem persónuleikapróf og umsagnir, styrktu það mat enn frekar,“ segir í fundargerð bæjarins. 

Már Svein­björns­son, fráfarandi hafn­ar­stjóri Hafn­ar­fjarðar­hafn­ar, tilkynnti í janúar á þessu ári að hann ætlaði sér að hætta vegna aldurs. Var þá umsvifalaust hafin vinna við að ráða nýjan hafnarstjóra.

Málefni Hafnarfjarðarhafnar voru í kastljósi fjölmiðla á síðasta ári eftir að meirihluti hafnarstjórnar vildi áminna starfsmann hafnarinnar fyrir að hafa sagst hafa farið á fund á laugardegi í ráðhúsi Hafnarfjarðar.

Ekki liggur fyrir hvort að sá fundur hafi átt sér stað en rannsókn fór fram innan Hafnarfjarðarkaupstaðar og málið rannsakað sem öryggismál. Már neitaði á þeim tíma að áminna starfsmanninn persónulega.

Lúðvík Geirsson, nýr hafnarstjóri, hefur komið víða við, verið bæjarfulltrúi í Hafnarfirði, bæjarstjóri og þingmaður Suðvesturkjördæmis. Hann hefur einnig verið formaður Blaðamannafélags Íslands svo fátt eitt sé talið. 

„Nýja starfið leggst vel í mig,“segir Lúðvík. „Ég er mjög þakklátur fyrir það traust sem mér er sýnt. Ég tel mig einnig þekkja ágætlega  til hafnarinnar, hef átt sæti í hafnarstjórnum áður og ég hlakka til að vinna með hafnarstjórn, hafnarstarfsmönnum og stjórnendum bæjarins að því að styrkja Hafnarfjarðarhöfn.“