Innlent

Yngstu kjósendur vilja Árna Pál eða Helga en þeir eldri Oddnýju

Kolbeinn Tumi Daðason skrifar
Oddný Harðardóttir, Árni Páll Árnason og Helgi Hjörvar.
Oddný Harðardóttir, Árni Páll Árnason og Helgi Hjörvar. Vísir
Flestir landsmenn telja Oddnýju Harðardóttur best til þess fallna að leiða Samfylkinguna, eða 35 prósent. Á hæla Oddnýjar kemur Helgi Hjörvar með 26,3% stuðning og svo Árni Páll Árnason með 22% stuðning. 

Þetta eru niðurstöður könnunar sem Gallup framkvæmdi dagana 14.-20. apríl síðastliðinn en um handahófsvalið úrtak var að ræða. Magnús Orri Schram fékk 13,7% atkvæða og Guðmundur Ari Sigurjónsson 3,1%.

Athygli vekur hve atkvæðin dreifa sig ólíkt eftir aldri kjósenda. Þannig nýtur Árni Páll langmests stuðnings í hópi 18-24 ára eða 56% fylgis en á sama tíma vilja 54% í hópnum 65 ára og eldri Oddnýju í formanninn. Helgi Hjörvar nýtur mest stuðnings í hópnum 25-34 ára eða 44%. Atkvæðin dreifa sér jafnar í öðrum aldurshópum.

Árni Páll tilkynnti um framboð sitt til formanns á ný í síðustu viku. Helgi Hjörvar tilkynnti um framboð sitt í febrúar, Oddný og Magnús Orri í mars og Guðmundur Ari sömuleiðis. Landsfundur Samfylkingarinnar fer fram 4. júní.

Niðurstöður könnunarinnar eftir aldri, búsetu og menntun má sjá hér að neðan. Marktækur munur var eftir aldri og búsetu en ekki menntun. 1432 manns 18 ára og eldri á öllu landinu tóku þátt í könnuninni og voru handahófsvalin úr viðhorfahópi Gallup. Þátttökuhlutfall var 57,7%. 

Uppfært klukkan 12:35

Í fyrri útgáfu fréttarinnar stóð á einum stað að könnunin hefði verið á meðal kjósenda Samfylkingarinnar. Það hefur verið lagað. Hópurinn var handahófsvalin úr viðhorfahópi Gallup.

 

Mest lesið


Fleiri fréttir

Sjá meira


×

Mest lesið