Rússar senda Bandaríkjamönnum tóninn

Rússar þvertaka fyrir að flugmenn þeirra hafi hagað sér glannalega og verið ófagmannlegir þegar þeir flugu að bandarískri flugvél yfir Eystrasaltshafi. Þeir segja að ekki hafi verið kveikt á radarsvara bandarísku vélarinnar og hún hafi nálgast flughelgi Rússa.

Bandaríkjamenn segja að rússneskri vél af gerðinni SU-27 hafi verið flogið allt að 30 metrum að bandarísku eftirlitsvélinni. Það sem meira er að rússnesku vélinni hafi verið flogið á hvolfi yfir þá bandarísku í miklu návígi.

Varnarmálaráðuneyti Rússlands segir að flugmenn þeirra hafi farið eftir alþjóðalögum.

„Flugher Bandaríkjanna getur valið milli tveggja möguleika. Annað hvort hætta þeir að fljúga að landamærum okkar eða kveikja á radarsvaranum,“ segir í tilkynning frá varnarmálaráðuneytinu.

Bill Urban, talsmaður Pentagon sagði atvikið hafa geta leitt til dauðsfalla.

Undanfarin misseri hafa komið upp nokkur atvik sem hafa valdið stirðleika í samskiptum Rússa og Bandaríkjanna. Fyrr í mánuðinum flugu tvær orrustuþotur Rússa lágt yfir bandarísku herskipi á Eystrasaltshafi. Sjá má myndband af atvikinu hér að neðan.