Taka tilboðum frá aðilum sem sérhæfa sig í samantektum á umfjöllun fjölmiðla

Mörg dæmi eru um að ráðuneyti hafi á undanförnum áratugum tekið tilboðum um þjónustu frá aðilum sem sérhæfa sig í söfnun upplýsinga. Þetta segir Ágúst Geir Ágústsson, skrifstofustjóri forsætisráðuneytisins, við fyrirspurn Vísis hvort innan forsætisráðuneytisins eða stjórnarráðsins fari fram einhverskonar greining á skrifum og umfjöllun um sitjandi stjórnvöld.

Tilefni þessarar fyrirspurnar var leiðari sem Sigurjón M. Egilsson flutti í þættinum Sprengisandi á Bylgjunni síðastliðinn sunnudag. Í leiðaranum greindi Sigurjón frá greiningardeild sem hann segir að hafi verið starfrækt í forsætisráðuneytinu í tíð Sigmundar Davíðs Gunnlaugssonar sem flokkaði það sem Sigurjón og aðrir sögðu og skrifuðu.

Kallaður á fund á laugardegi í janúar

Í leiðaranum sagði Sigurjón að deildin hefði dundað sér við að flokka niður það sem hann sagði og skrifaði sem og ýmsir aðrir. Sagðist Sigurjón hafa verið kallaður á teppið af forsætisráðuneytinu en í samtali við Vísi segir Sigurjón það hafa gerst á laugardegi í janúar í fyrra.

„Forsætisráðherra hringdi í mig og bað um að fá að hitta mig,“ segir Sigurjón. Hann tekur fram að hann sé gagnrýninn í sínum störfum og segir Sigmund Davíð mega vera gagnrýninn á sig.

Sigurjón sagði forsætisráðherrann hafa kynnt sér fyrir niðurstöðu þessarar greiningar á skrifum hans en hún var sú að Sigurjón gerði ríkisstjórn Sigmundar Davíðs erfitt fyrir. Greiningin leiddi einnig í ljós að Sigurjón hafði oftast verið „vondur“ við Framsóknarflokkinn. 

Mátti ekki gera athugasemd við greininguna

„Ég er alveg maður til að hlusta á það og taka því. Ég spurði hvort ég mætti gera athugasemd við greininguna og hann hafnaði því. Ég spurði hver hefði greint þetta og hann sagðist ekki ætla að segja það. Ég vinn við að gagnrýna og hef gagnrýnt hann mjög oft. Hann má alveg gagnrýna mig og þó það sé á tveggja manna fundi þá finnst mér það bara hluti af þessu ferli öllu saman. Þetta meiddi mig ekki á nokkurn hátt. Ég fór ósár af fundinum,“ segir Sigurjón við Vísi.

Taka tilboðum um samantektir

Í svari við fyrirspurn Vísis segir Ágúst Geir Ágústsson að á vegum forsætisráðuneytisins hafi ekki verið starfrækt greiningardeild af því tagi sem spurt var um, það er greining á skrifum og umfjöllun um sitjandi stjórnvöld.

„Né hefur ráðuneytið, hvorki í tíð fyrri ríkisstjórnar né áður, svo kunnugt sé, viðhaft skipulega greiningu eða flokkun á umfjöllun fjölmiðla um sitjandi stjórnvöld og stjórnarflokka á hverjum tíma,“ segir Ágúst Geir.

Hann segir hins vegar mörg dæmi um að ráðuneyti hafi á undanförnum áratugum tekið tilboðum um þjónustu frá aðilum sem sérhæfa sig í söfnun upplýsinga og nefnir sem dæmi Fjölmiðlavaktina og Creditinfo.

Gert til að meta hvort bregðast þurfi við umfjöllun

„Er þá um að ræða faglegar samantektir á umfjöllun fjölmiðla um þjóðmálin og þá sérstaklega umfjöllun sem snýr að stjórnarmálefnum sem heyra undir viðkomandi ráðuneyti. Er markmið með slíkum samantektum m.a. að skapa grundvöll fyrir mat á því hvort bregðast þurfi við tiltekinni umfjöllun og meta hvort veita þurfi frekari upplýsingar til þess að svara hugsanlegum upplýsingabeiðnum og eftir atvikum undirbúa viðbrögð viðkomandi ráðherra við umfjöllun um mál á Alþingi og annars staðar í samfélaginu,“ segir Ágúst Geir.

Hann segir slíka samantekt upplýsinga einnig þjóna sögulegum tilgangi til lengri tíma litið, svo sem þannig að nýir ráðherrar geti kynnt sér umfjöllun fjölmiðla á viðkomandi málefnasviðum.