Mikilvirkur svikahrappur dæmdur í fangelsi

Hæstiréttur staðfesti í dag tveggja og hálfs árs fangelsisdóm yfir Sigurði Kárasyni fyrir stórfelld fjársvik á árunum 2006 til 2010. Sigurður var dæmdur fyrir að hafa svikið á annað hundrað milljónir króna út úr sextán manns.

Sigurði var gefið að sök að hafa haft gríðarlegar upphæðir af fjölda fólks. Um var að ræða fólk úr öllum stigum samfélagsins, þar á meðal presti, flóttamanni og vörubílstjóra. Í mörgum tilfellum var þetta félítið fólk sem tók lán eða yfirdrátt til að geta látið Sigurð fá peninga, sem hann sagðist meðal annars ætla að nýta til gjaldeyrisviðskipta og til kaupa á krónubréfum. Fólkið átti svo að njóta ávöxtunar sem yrði til vegna viðskiptanna við Sigurð.

Svikamyllan krafðist sífellt nýrra fórnarlamba þar sem Sigurður fékk nýtt fólk til að millifæra inn á þá sem harðast sóttust um endurgreiðslu. Við aðalmeðferð málsins kom fram að lögreglan hefði undir höndum gögn sem sýna hvernig peningar streymdu þannig á milli fórnarlambanna, frá nýjum til eldri.

Peningana er Sigurður sagður hafa notað bæði til að greiða eldri skuldir og eins til eigin framfærslu, en á skattframtölum Sigurðar og eiginkonu hans sést að hann var eignalaus og gjaldþrota þegar hann á að hafa framið brot sín.