Flestir Íslendingar fá þann jólamat sem þeir kjósa sér helst af öllu

Tæplega áttatíu prósent Íslendinga borða það sem þeir vilja helst á aðfangadag samkvæmt nýrri könnun.

Samkvæmt niðurstöðunum, sem kynntar voru á Vorráðstefnu Viðskiptastofnunar Háskóla Íslands ræður hefð mun meira en verð um hvað verður fyrir valinu á aðfangadag. Tveir af hverjum þremur sögðu að hefðin réði en aðeins tæplega sex prósent að verð réði því hvað væri í matinn á jólunum.

Langvinsælasti rétturinn er hamborgarhryggur en fimmtíu prósent svarenda nefndu hann sem jólamatinn. Þá hugðust níutíu prósent þeirra sem voru með hamborgarhrygg í matinn hafa hann á ný næsta aðfangadagskvöld. Næstvinsælasti rétturinn er kalkúnn með tíu prósenta hlutdeild en 78 prósent hugðust hafa hann á ný um næstu jól. Í þriðja sæti var rjúpa með tæplega tíu prósenta hlutdeild og hugðust 87 prósent þeirra hafa rjúpu í matinn á ný næsta aðfangadagskvöld.

Í ágripi könnunarinnar, sem Þórhallur Guðlaugsson, dósent við viðskiptafræðideild Háskóla Íslands, ritar segir að áhugavert sé hve mikil áherslu sé lögð á verð í auglýsingum fyrir jólin þegar hefðir ráði mestu um hvað sé í matinn á jólunum.

Könnunin fór fram í október og nóvember síðastliðnum og var heildarfjöldi svara 5.086 eftir að gölluðum svörum hafði verið eytt.

Þessi frétt birtist fyrst í Fréttablaðinu þann 21. apríl.