Ákvörðun um kæru tekin á þriðjudag

Minjastofnun Íslands mun fara yfir svar sem stofnuninni hefur borist frá Mannverk ehf. eftir helgi og þá taka ákvörðun um það hvort stofnunin kæri fyrirtækið fyrir niðurrif hússins við Tryggvagötu 12, sem oft er kallað Exeter-húsið.

Húsið var byggt árið 1904 og friðað, en það var rifið í leyfisleysi fyrr í mánuðinum. Minjastofnun óskaði í síðustu viku eftir frekari upplýsingum um málið frá Mannverk. Svar við því erindi barst á mánudag og stóð til að fara yfir það nú í vikunni.

Að sögn Kristínar Huldar Sigurðardóttur, forstöðumanns Minjastofnunar, hefur þó ekki gefist tími til þess og stendur til að gera það næsta þriðjudag.

Borgaryfirvöld hafa kært niðurrifið til lögreglu og svo gæti farið að Minjastofnun geri það líka.