Féll útbyrðis á Húnaflóa og lést

Karlmaður á sextugsaldri lést eftir að hafa fallið útbyrðis af báti á veiðum á Húnaflóa austur af Drangsnesi um miðjan dag í gær. Tveir voru við veiðar í bátnum sem gerður er út frá Hólmavík.

Þetta staðfestir Hannes Leifsson, aðalvarðstjóri hjá lögreglunni á Hólmavík, í samtali við Vísi.

Hinn bátsverjinn hafði samband við neyðarlínuna og var þyrla Landhelgisgæslunnar send á vettvang og nærliggjandi björgunarsveitum gert viðvart. Mætti þyrlan fyrst á vettvang en maðurinn var úrskurðaður látinn á staðnum. 

Ekki er unnt að greina frá nafni hins látna að svo stöddu. Lögreglan á Vestfjörðum rannsakar málið en tildrög slyssins liggja ekki fyrir. DV.is greindi fyrst frá.