LSD veldur aukinni virkni í heila

Nýleg rannsókn á ofskynjunarlyfinu LSD gefur vísbendingar um það að  lyfið auki verkun á milli heilasvæða á þann hátt að svæði sem venjulega séu lítið virk við tiltekna hegðun virkist svipað mikið og þau svæði sem virkjast venjulega hjá þeim sem ekki eru undir áhrifum lyfsins.

Til dæmis virki sjónáreiti mun fleiri heilasvæði hjá þeim sem eru undir áhrifum LSD en hjá þeim sem eru það ekki. Talið er því að LSD valdi því að fleiri heilasvæði í einu bregðist við ýmis konar áreitum undir áhrifum lyfsins. Hugmyndin er því sú að fólk noti meira af heilanum til þess að vinna úr upplýsingum undir áhrifum LSD en ekki.

Þetta kemur fram í rannsókn Imperial College í London á efninu en rannsóknin er leidd af taugasálfræðingnum David Nutt sem starfaði áður sem eiturlyfjaráðgjafi fyrir bresku ríkisstjórnina. Rannsóknin var gerð á 20 einstaklingum sem samþykktu að láta sprauta 0.075 milligrömmum af efninu í blóðrás sína.

Einn daginn fengu þátttakendur staðleysulyf en smá skammt af LSD þann næsta. Báða daganna voru þeir settir í segulómna (fMRI) heilaskanna og hin ýmsu áreiti prófuð á þeim. Í ljós kom að heilar þeirra sýndu mun meiri og dreifðari virkni eftir lyfjagjöfina en áður. Það sem kom mest á óvart var að heilasvæði sem venjulega virkjast lítið við tiltekin áreiti sýndu nú mikla virkni.

Higgs-boson taugavísindanna

Annar hluti rannsóknarinnar sýndi svo að virkni á milli heilasvæði sem vinna venjulega saman úr upplýsingum minnkaði. Það var í samræmi við þá lýsingu þeirra sem tóku lyfið að þeim liði sem þeir væru í „betri tengslum við alheiminn“ og finndu minna fyrir eigin sjálfi.

„Þetta er fyrir taugavísindi það sem Higgs-boson var fyrir örvísindi“, segir Nutt en hann og félagar hans túlka niðurstöður rannsóknarinnar á þann veg að LSD losi heilann frá þeim „vinnu“-mynstrum sem hann tileinki sér á milli barnæsku og fullorðinsára. Hann er því bjartsýnn um að rannsóknin geti hjálpað til við að skilja það þroskaferli heilans sem eigi sér stað á uppvaxtarárum.

Þetta verði til þess að maðurinn muni öðlast enn betri skilning á sjálfri meðvitundinni (consciousness) sem og bjóða upp á nýjar læknismeðferðir fyrir ýmsa andlega kvilla á borð við þunglyndi.

Vefur The Guardian fjallar ítarlega um málið.

Hér fyrir neðan má sjá myndband The Guardian um rannsóknina.