Útigangsmaðurinn í HR sendur til síns heimalands

Erlendur karlmaður sem undanfarnar tvær vikur hefur gert sig heimakominn í húsnæði Háskólans í Reykjavík hefur verið sendur aftur til síns heimalands. Þetta kemur fram í tölvupósti sem sendur var á nemendur við skólann í dag.

Greint var frá því í gær að öryggisgæsla við skólann yrði aukin í kjölfar þess að upp komst að maðurinn hefði sofið í kjallaranum að undanförnu.

Jóhann Karl Þórisson, lögreglufulltrúi hjá lögreglunni á höfuðborgarsvæðinu, sagði þá að um væri að ræða andlega veikan mann frá Lettlandi eða Litháen og að unnið væri að því að koma honum aftur til síns heima.

„Við erum í samstarfi við yfirvöld þar,“ sagði Jóhann Karl í samtali við Vísi. „Þegar það eru svona mikil andleg veikindi, þá er ekki hægt að tjónka við fólki. Það er betra að hann sé í sínu heilbrigðiskerfi þar sem starfsfólk þekkir hann og hans sögu.“

Samkvæmt póstinum sem nemendum barst í dag var maðurinn fluttur til Keflavíkur í morgun og þaðan til síns heimalands.