Nemendum í Háskólanum í Reykjavík barst í dag tilkynning þess efnis að öryggisgæsla í húsinu yrði aukin. Gripið var til þessara aðgerða sökum þess að karlmaður hefur undanfarnar tvær vikur gert sig heimakominn í húsnæði skólans og sofið í kjallara hans.
„Þetta er andlega veikur einstaklingur frá Lettlandi eða Litháen,“ segir Jóhann Karl Þórisson lögreglufulltrú hjá Lögreglunni á höfuðborgarsvæðinu í samtali við fréttastofu. Jóhann segir að unnið sé að því að koma manninum aftur til síns heima.
„Við erum í samstarfi við yfirvöld þar. Þegar það eru svona mikil andlega veikindi þá er ekki hægt að tjónka við fólki. Það er betra að hann sé í sínu heilbrigðiskerfi þar sem starfsfólk þekkir hann og hans sögu.“
Í tilkynningunni kemur fram að inngangi skólans, sem snýr að Öskjuhlíð, verði lokað eftir klukkan 22 á kvöldin. Þá er biðlað til nemenda að hleypa óviðkomandi ekki inn í skólann eftir að hefðbundnum opnunartíma lýkur.
