Munu ekki sætta sig við niðurstöður

Búist er við því að Ba'ath-flokkurinn, flokkur Bashars Al-Assad Sýrlandsforseta, hafi unnið stórsigur í þingkosningum sem fóru fram í Sýrlandi í gær.

Ráðamenn á Vesturlöndum eru ekki hrifnir af kosningunum og hefur forsetinn verið sakaður um að reyna að spilla fyrir friðarviðræðum á milli stríðandi fylkinga í landinu sem hófust á ný í svissnesku borginni Genf í gær. Ein helsta krafa andstæðinga ríkisstjórnar Assads í viðræðunum er að hann segi af sér embætti.

Talsmaður utanríkisráðuneytis Þýskalands sagði í gær ómögulegt að halda sanngjarnar og lýðræðislegar kosningar í því ástandi sem er við lýði í Sýrlandi í dag, en í landinu ríkir borgarastyrjöld. „Þýska ríkisstjórnin mun ekki sættast á niðurstöður kosninga sem ríkisstjórn Assads boðar til,“ sagði talsmaðurinn, Martin Schäfer.

Ríkisstjórn Bretlands sendi einnig frá sér yfirlýsingu. Þar eru kosningarnar kallaðar skrumskæling lýðræðisins. Einnig voru bandamenn Assads, sérstaklega Rússar, hvattir til að þrýsta á að Assad gefi eftir í friðarviðræðum.

Sergei Lavrov, utanríkisráðherra Rússa, sagði kosningarnar hins vegar nauðsynlegar til að koma í veg fyrir að tómarúm skapaðist í landinu. Þá segir talsmaður ríkisstjórnar Assads kosningarnar samræmast stjórnarskrá og alls ótengdar friðarviðræðunum í Genf. Niðurstöður kosninga lágu ekki fyrir í gærkvöldi. Síðast var kosið árið 2012 en þá fékk flokkur Assads 168 þingsæti af 250.

Borgarastyrjöldin í Sýrlandi hefur staðið yfir frá árinu 2011. Að minnsta kosti 470 þúsund hafa látið lífið. Nærri átta milljónir eru á vergangi innan landsins eftir að heimili þeirra voru lögð í rúst og um fjórar milljónir hafa flúið land.

Vopnahlé hefur verið í landinu frá því í febrúar en þó eru hryðjuverkahreyfingarnar Al-Nusra, Al-Kaída og Íslamska ríkið undanskildar því.

Fréttin birtist fyrst í Fréttablaðinu 14. apríl.