Nígerísku skólastúlkurnar taldar á lífi

Liðsmenn hryðjuverkasamtakanna Boko Haram hafa sent frá sér myndband sem sannar að skólastelpur sem teknar voru í gíslingu árið 2014 séu enn á lífi. Vígamenn Boko Haram réðust vopnaðir byssum inn í heimavistarskóla í bænum Chibok í Nígeríu í apríl árið 2014 og námu á brott 276 stúlkur. Ekkert hafði heyrst af stúlkunum síðan þá.

Brottnám skólastúlknanna vakti mikla reiði og var fordæmt um allan heim og varpaði athygli á átökin í Nígeríu.

Í myndbandinu er rætt við stúlkurnar og segir ein þeirra að þær séu við góða heilsu. Talið er að myndbandið hafi verið tekið upp í desember síðastliðnum og notað í samningaviðræðum samtakanna og nígerískra stjórnvalda.

Nígerísk stjórnvöld segjast hafa eintak af myndbandinu. Þó segja stjórnvöld ekki hægt að staðfesta uppruna myndbandsins.

Fréttin birtist fyrst í Fréttablaðinu 14. apríl.