Ungverska stúlkan fær aðstoð stéttarfélags

Zsófía Sidlovits, ungversk stúlka sem vann allt að tvö hundruð tíma á mánuði án samnings og fékk greitt undir lágmarkskjörum fær aðstoð Bárunnar stéttarfélags. Zsófía vann á sveitabænum Fjalli I á Suðurlandi og greindi sjálf frá aðstæðum sínum í viðtali við Fréttablaðið. Í máli hennar kom fram að þrátt fyrir allt hafi hún kunnað vel við húsráðendur og þótti vænt um börn og dýr sem hún annaðist. Tilfinningar hennar voru því blendnar.

Hún var sótt á fund til stéttarfélagsins í gær og næsta skref verður að afla gagna í málinu. „Við hlýðum á hennar sögu, sendum fólk á svæðið og við munum gera kröfu vegna vinnu hennar. Það er mikil vinna fram undan,“ segir Halldóra Sveinsdóttir formaður Bárunnar stéttarfélags.

„Stéttarfélögin eru mikið í þessu ferli, að reikna út kröfur og innheimta en það girðir því miður ekki fyrir síendurtekin brot hjá sömu aðilum. Annars vegar eru þetta aðilar með einbeittan brotavilja eða ákveðin vanþekking sem auðvelt er að vinna með,“ segir hún og dregur málið saman.

„Í hennar tilfelli þá kemur fram að hún vinnur í 10-12 klukkustundir á dag og fær greiddar fjörutíu til sextíu þúsund krónur á mánuði. Hún er ekki með ráðningarsamning. Hún er réttlaus, ótryggð og einangruð. Hún var háð þeim með húsaskjól og það er spurning hvernig var með aðgengi að heilbrigðisþjónustu. Þetta mál þarfnast frekari skoðunar og gæti flokkast undir þrælkun. Það eru alltaf að koma upp ný og ný mál sem fær mann til þess að velta fyrir sér umfangi þessa.“ 



Fréttin birtist fyrst í Fréttablaðinu 15. apríl