Stálu bensíni á bílaleigu og kveiktu í bílum sem gjöreyðilögðust

Héraðssaksóknari hefur ákært tvo menn á þrítugsaldri fyrir bensínþjófnað og brennu á bílastæði bílaleigunnar Lykilbíla haustið 2012. 31 bíl var lagt á bílaplaninu en þeir voru allir mannlausir.

Mönnunum er gefið að sök að hafa gert gat með skrúfjárni á eldsneytistanka þriggja Suzuki Grand Vitara bíla og látið eldsneytið renna í gegnum götin af tönkunum í eldsneytisbrúsa sem þeir höfðu meðferðis, og þannig stolið eldsneytinu.

Svipmyndir frá vettvangi má sjá í sjónvarpsfréttinni hér að neðan.

Þá er annar maðurinn einnig ákærður fyrir brennu, með því að hafa við sama tilefni, tendrað eld með kveikjara og borið að eldsneytisbrúsanum og þannig kveikt eld í framangreindri bifreið. Eldurinn breiddist út til fjögurra annarra bifreiða með þeim afleiðingum að þær eyðilögðust allar.

Þá urðu einnig skemmdir á þremur öðrum bílum á bílastæðinu.

Í ákærunni segir að með háttsemi sinni hafi hann ákærði valdið eldsvoða sem hafði almannahættu í för með sér, sem og hættu á eyðingu allra annarra bifreiða sem á bílaplaninu stóðu hefði eldurinn náð að breiðast frekar út. Slökkvilið réð niðurlögum eldsins en þá voru mennirnir á bak og burt.

Málið verður þingfest í Héraðsdómi Reykjaness á morgun.