Bensínþjófar ollu eldsvoða

Átta bílar urðu eldi að bráð við Iðavelli í Keflavík um miðnætti þegar skammhlaup varð í dælubúnaði bensínþjófa sem þar voru á kreiki.

Samkvæmt upplýsingum frá lögreglu voru nokkrir bensínþjófar á svæðinu, búnir rafdælubúnaði sem fóru milli bíla og dældu af þeim bensíni. Rétt fyrir klukkan tólf í gærkvöldi virðist skammhlaup hafa orðið í rafgeymi og dælubúnaði hjá þeim með þeim afleiðingum að eldur blossaði upp.

Nokkrir bílar brunnu illa og eru gerónýtir, en bílarnir voru geymdir við iðnaðarhúsnæði við Iðavelli ásamt tugum annarra bílaleigubíla.

Á vef Víkurfrétta segir að þegar slökkvilið Brunavarna Suðurnesja kom á staðinn uppúr klukkan tólf í gær hafi verið mikill eldur á svæðinu og mikil mildi að ekki fór verr, enda stóðu bílarnir þétt saman og eldurinn hefði auðveldlega borist á milli þeirra.

Bensínþjófarnir voru á bak og burt þegar lögregla kom á svæðið en slökkviliðsmenn réðu niðurlögum eldsins á skömmum tíma.