Ákærðir fyrir sérstaklega hættulega líkamsárás hvor á öðrum

Tveir karlmenn á þrítugsaldri sæta kæru ríkissaksóknara vegna sérstaklega hættulegra líkamsárása, hvor á öðrum. Mennirnir slógust í fjölbýlishúsi í Reykjanesbæ í október 2013 og veittu hvor öðrum áverka.

Annar maðurinn er 24 ára og hinn 27 ára. Sá yngri er ákærður fyrir að hafa lagt til efri hluta líkama hins með hnífi en sá náði að bera hendurnar fyrir sig þannig að sá eldri stakk hann í fingur hægri handar.

Afleiðingar árásarinnar voru þær að sá yngri hlaut tvo 2-3 sm skurði á innanverðum fingrum hægri handar og beygjusin á vísifingri skarst í tvennt með þeim afleiðingum að hreyfigeta fingursins skertist.

Telst þetta varða við 2. mgr. 218. gr. almennra hegningarlaga en brot á lögunum varða allt að þriggja ára fangelsi.

Sá eldri vill skaðabætur

Eldri maðurinn er bæði ákærður fyrir sérstaklega hættulega líkamsárás og líkamsárás á hinn yngri, við sama tilefni. Er honum gefið að sök að hafa í framhaldi af atburðunum sem lýst er að ofan kýlt þann yngri með krepptum hnefa í andlitið, kastað steikarpönnu í vinstri handlegg hans og svo kastað hnífi í áttina að honum. Hnífaskaftið hæfði hann í hægra lærið.

Afleiðingar árásarinnar voru þær að yngri maðurinn hlaut 4 sm skurð á höku, bólgna vör, 3 sm sár á vinstri handlegg og marblett á hægra læri.

Hnífakastið varðar broti á 2. mgr. 218 gr. almennra hegningarlaga en brot á lögunum varða allt að þriggja ára fangelsi. Hin ákæruefnin snúa að 1. mgr 217. greinar sömu laga og varða fangelsi allt að einu ári.

Þá krefst sá eldri skaða- og miskabóta upp á 1,7 milljón króna frá þeim yngri. Málið er til meðferðar í Héraðsdómi Reykjaness.