Báðar tillögurnar felldar

Vantrauststillaga stjórnarandstöðunnar var felld á Alþingi nú fyrir stuttu.

Tillagan var í tveimur liðum. Atkvæði voru fyrst greidd um vantraust á ríkisstjórnina og í kjölfarið um þingrof og nýjar kosningar.

Enginn stjórnarþingmaður greiddi atkvæði með fyrri tillögunni en Unnur Brá Konráðsdóttir, þingmaður Sjálfstæðisflokksins, greiddi tillögu með því að rjúfa þing og boða til kosninga.

„Ég tel að Sjálfstæðisflokkurinn, sem og þjóðin öll, hafi hag af því að fara í kosningar,“ sagði Unnur Brá þegar hún gerði grein fyrir atkvæði sínu.

Bjarni Benediktsson, formaður Sjálfstæðisflokksins, og Katrín Jakobsdóttir, formaður Vinstri grænna, tjáðu sig um atkvæðagreiðsluna og stöðuna á Alþingi í kvöldfréttum Stöðvar 2 stuttu eftir að atkvæðagreiðslunni lauk.