Gussi veiddi risaþorsk á sjóstangveiðimóti

Gunnar Jónsson, betur þekktur sem leikarinn Gussi, veiddi þorsk sem reyndist 37,5 kíló og er það líkast til met. Ekki er vitað til þess að svo mikill þorskur hafi veiðst á sjóstöng. Gunnar, sem sjálfur er engin smásmíði, átti fullt í fangi með að lyfta ferlíkinu fyrir myndatöku.

Gussi þaulvanur stangveiðimaður

Það er vefmiðillinn Skessuhorn sem greinir frá þessu, en þar segir frá því að Sjóstangaveiðifélagið Skipaskagi á Akranesi hafi staðið fyrir innanfélagsmóti í sjóstangveiði á laugardaginn í blíðskaparveðri. Tuttugu og þrír tóku þátt og þar af voru sex nýliðar. Gussi er ekki einn af þeim, þaulvanur sjóstangveiðimaður, forfallinn reyndar og þræðir hann sjóstangveiðimótin.

„Jóhannes Simonsen formaður Skipaskaga var aflahæstur karla með 384,55 kg og Ágústa S Þórðardóttir var aflahæst kvenna með 104,1 kg. Aflahæsti báturinn var Þerna AK með heildarveiði upp á 964,2 kg og var Högni Reynisson skipstjóri,“ segir í Skessuhorni sem ræðir við Jóhannes. Hann segir frá því að óvenju stór og þungur fiskur hafi veiðst á mótinu en þetta mun hafa verið í fyrsta skipti sem mótið er haldið fyrir árlegt veiðistopp sem er frá 1. til 21. apríl.

Þrír yfir Íslandsmetinu

„Það sem gerir mótið sérstakt er að við gerðum tilraun til að halda mótið fyrir páskastoppið þegar fiskurinn er að hrygna. Innanfélagsmótið var því haldið á meðan stórfiskurinn er enn í Faxaflóa,“ segir Jóhannes í samtali við Skessuhorn. Meðalþyngd fiska reyndist töluvert hærri en vanalega eða um 9,5 kíló.

Magnús Magnússon, ritstjóri Skessuhorns, fylgdist grannt með gangi mála og hann segir, í samtali við Vísi að að einir þrír þorskar hafi veiðst í mótinu sem voru yfir gildandi Íslandsmeti. „En, þeir vilja ekki gera það að Íslandsmeti vegna þessa að mótið fór fram á óhefðbundnum tíma, það er fyrir hrygningarstopp.“