Vinstriflokkarnir eru undir átta prósentum

Bæði Samfylkingin og Vinstri græn mælast með fylgi undir átta prósentum í skoðanakönnun MMR sem gerð var á tímabilinu 23. febrúar til 1. mars.

Píratar mælast enn stærsti flokkurinn með 37 prósenta fylgi og Sjálfstæðisflokkurinn er með 23,4 prósenta fylgi. Framsóknarflokkurinn er með 12,8 prósenta fylgi og Björt framtíð með 4,2 prósenta fylgi.

Niðurstaða könnunar MMR er í samræmi við niðurstöðu könnunar sem birtist í Fréttablaðinu 10. mars síðastliðinn. Þar kemur fram að Píratar eru stærstir með 38,1 prósents fylgi og Samfylkingin og VG með rétt rúmlega 8 prósenta fylgi. Helsti munurinn á könnunum Fréttablaðsins og MMR er að í könnun Fréttablaðsins mælist fylgi Sjálfstæðisflokksins heldur meira (27,6%), en fylgi Bjartrar framtíðar mælist heldur minna (1,8%).

Svarendur í könnun MMR eru 926 en ekki er tekið fram hvert svarhlutfallið er. Svarendur eru einstaklingar 18 ára og eldri, valdir handahófskennt úr hópi álitsgjafa MMR.