Undirskriftir gegn áfengisfrumvarpi

Meira en 2.000 manns hafa ritað nafn sitt undir áskorun þess efnis að alþingismenn greiði atkvæði gegn frumvarpi um frjálsa sölu áfengis sem liggur fyrir Alþingi.

„Ég hvet alþingismenn til þess að greiða atkvæði gegn frumvarpi til laga um breytingu á verslun með áfengi og tóbak (Þingskjal 13 – 13. mál) sem nú liggur fyrir Alþingi og standa vörð um góðan árangur í áfengis- og vímuefnamálum ungs fólks á Íslandi,“ segir í texta með undirskriftasöfnuninni.

Núll prósent samtökin, ráðgjafahópur umboðsmanns barna og ungmennaráð Barnaheilla, standa að undirskriftasöfnuninni.

Frumvarpið var afgreitt frá allsherjar- og menntamálanefnd Alþingis síðastliðinn þriðjudag. Nefndin gerði þær breytingar á frumvarpinu að sveitarfélög geta sett reglur um hvort áfengi í matvöruverslunum skuli vera aðskilið frá öðrum vörum og breytingu þess efnis að 2,5 prósent áfengisgjaldsins renni í Lýðheilsusjóð og 2,5 prósent til ríkislögreglustjóra til að sinna eftirliti með framkvæmd laganna.