Auðæfi Bin Ladens námu fjórum milljörðum króna

Stjórnvöld í Bandaríkjunum gerðu fjölmörg einkaskjöl Osama Bin Ladens, fyrrverandi leiðtoga Al-Kaída hryðjuverkasamtakanna, opinber í dag. Meðal skjalanna var að finna erfðaskrá Bin Ladens auk fjölda persónulegra bréfa.

Í erfðaskránni sem rituð var seint á tíunda áratugnum, kemur fram að hann átti 29 milljónir Bandaríkjadala (jafnvirði 3,8 milljarða króna) og þar kom fram hvernig hann vildi að arfinum yrði deilt. Bin Laden hvatti fjölskyldu sína til að framfylgja erfðaskrá sinni og eyða arfleifðinni í jihad, hið heilaga stríð íslams.

Af persónulegum bréfum Bin Ladens má ráða að hann hafi óttast það að dagar hans yrðu ekki fleiri. Í bréfi sem Bin Laden skrifaði föður sínum árið 2008 óskaði hann eftir því að faðir hans myndi hugsa um eiginkonuna og synina ef til þess kæmi að hann yrði ráðinn af dögum.

Osama Bin Laden bar höfuðábyrgð á hryðjuverkaárásunum 11. september 2001 og eftir árásina lögðu Bandaríkjamenn mikla áherslu á að finna hann. Bin Laden féll í skotbardaga í maí 2011 þegar fámenn bandarísk hersveit gerði áhlaup á höll sem hann dvaldi í nálægt Abbottabad í Pakistan.