Fær ekki Kjarval en má nota sitt nafn á jörðina

Breyta má nafni jarðarinnar Hleinargarðs II á Héraði og nefna í höfuðið á nýjum eiganda. Bæjarstjórn Fljótsdalshéraðs samþykkti þetta á miðvikudag.

„Ég óskaði nú reyndar fyrst eftir því að breyta nafninu í Kjarvalsstaði en því var synjað svo ég sneri mér þá einfaldlega að næsta stórmenni,“ segir Davíð Þór Sigurðarson og hlær.

Davíð eignaðist Hleinargarð II í nóvember 2013. Er það sá hluti jarðarinnar sem er óbyggður. Hinn hlutinn mun áfram bera nafnið Hleinargarður en jörð Davíðs nafn hans sjálfs og heita Davíðsstaðir. Þar segist hann hafa hug á að byggja upp skógrækt og ættaróðal fyrir börn sín að erfa í fyllingu tímans.

Sex bæjarfulltrúar greiddu því atkvæði en þrír sátu hjá þegar bæjarstjórnin samþykkti nafnbreytinguna. Stefán Bogi Sveinsson, fulltrúi Framsóknarflokksins, benti á í bókun að málið væri það þriðja sinnar tegundar eftir nýlega lagabreytingu sem gerir það að hlutverki sveitarstjórna að ákveða um nafngiftir á jörðum. Áður hafi einni beiðni verið synjað en önnur samþykkt.

„Ég mun greiða atkvæði með því að samþykkja fyrirliggjandi beiðni, en legg hins vegar áherslu á að ástæða sé til þess að bæjarstjórn móti sér einhverjar viðmiðunarreglur um hvernig fara á með mál af þessu tagi,“ bókaði Stefán Bogi. „Það er mín skoðun að miða ætti við að samþykkja beiðnir um nafnabreytingu og nýjar nafngiftir nema að eitthvað sérstakt mæli gegn því.“

Stefán Bogi nefnir dæmi um þrjú atriði sem hann telji geta mælt gegn því að samþykkja nafnbreytingu á jörð. Í fyrsta lagi að nafnið sé of líkt eða tengist óeðlilega nafngift annars staðar innan sveitarfélagsins. Í öðru lagi að með breytingunni hverfi gamalt og gróið nafn á viðkomandi jörð. Og að lokum að nafnið „brjóti verulega gegn almennri smekkvísi“, eins og hann orðar það.

„Ekkert af framangreindu á við í þessu máli, þótt deila megi um þá aðferð að nefna jörð í höfuðið á eiganda hennar, en slíkt hefur tæplega tíðkast hér á landi um að minnsta kosti nokkur hundruð ára skeið,“ bendir bæjarfulltrúinn á.

Davíð Þór segist vonsvikinn að hafa ekki fengið að nefna jörðina Kjarvalsstaði. Það hafi hann viljað gera í virðingarskyni við Jóhannes Kjarval sem málaði mikið þar á svæðinu. Nálægur sé einmitt Kjarvalshvammur, reyndar í landi Ketils­staða, sem kenndur er við listamanninn er dvaldist þar í litlum kofa.

„Þeir staðir á landinu sem tengdir eru nafni Kjarvals hafa beina skírskotun til listamannsins,“ sagði bæjarstjórnin í fyrra þegar hún hafnaði beiðni Davíðs Þórs um Kjarvalsstaðanafnið.

„Ég skil eiginlega ekki hvers vegna Kjarvalsstaðir voru ekki samþykktir fyrst bæjarstjórnin leyfir Davíðsstaði,“ segir eigandi Hleinargarðs II – bráðum Davíðsstaða.